Brazil-in Copa America squad a puang
Thawhlehni khan Brazil coach Dunga-a'n Copa America khel tur player 23 awmna Brazil squad a puang.
Chelsea midfielder Oscar chu inhliam vangin telh a ni lo a, Liverpool tana season ṭha tak hmang Philippe Coutinho erawh Copa America khel tur zinga telh a ni.
Brazil Squad-ah Lammuala Mizoram hmachhawn tawh pakhat a awm a, a hming chu Roberto Firmino a ni. Hoffenheim forward hian Austria leh Chile nen friendly match an khelh ṭumin chakna goal a khung ve ve a, FIFA World Cup history-a record nei ṭha ber Brazil team-ah Firmino hian hmun pawimawh a chan ngei ang.
Santos tana khel ṭha tak Robinho pawh squad-ah hian telh a ni. Manchester City forward hlui hi AC Milan aṭangin loan-in a larchhuahna club Santos-ah a vanglai hun a hmang ṭha leh mek. Kum 31-upa Robinho hian kum 2007 khan an ram hi Copa America-ah a lo champion pui tawh.
Brazil hian June 14 khian an match hmasa berah Peru an hmachhawn dawn a, an group-ah hian Colombia leh Venezuela te an awm bawk.
Brazil coach Dunga chuan, "Oscar hi training-naah a inhliam a, Jose Mourinho leh Chelsea doctor kan be bawk. Inelna ṭan hunah ngai a awh hman dawn loh avangin Copa America khel turin kan telh lo," tiin a sawi a. 2018 World Cup qualifiers khelh huna a telh leh tur thu a sawi thung.