Newcastle captain-in ngaihdam a dil

Newcastle United captain Fabricio Coloccini chuan Premier League-a result ṭha an neih theih loh avangin supporter-te chungah ngaihdam a dil.

Magpies hi table-ah 15-naah an awm a, 18-naa awm Sunder­land nen an inkarah point hnih chiah a awm. Newcastle hi a zawnin vawi riat an chak tawh lo a, kum 1977 hnua an chak loh zawn rei ber a ni.

Kum 33-a upa Coloccini chuan, "Tun hnaia kan result avang hian squad aiawhin min ṭantute chungah ngaihdam ka dil a ni. Insiamṭha turin hun kan nei tam tawh lo a, season a zo anga, kan tihsualte kan thlir kir anga, hetiang dinhmunah chuan kan din tir tawh lo ang che u," tiin tla thei dinhmuna an din chungchang a sawi.

Argentine defender chuan sawi zelin, "Tun kan dinhmun hi in tana a hreawm tluk zetin kan tan pawh a na a ni. A chhan chu field chhung kan luh hian chak kan tum a, Newcastle United hmel tih hliau kan duh lo a, chumai a ni lo - mipui ṭhahnem tak aiawh kan ni tih ka hria," tiin an khelh chhana an chian thu a sawi.

Newcastle senior player-te leh club managing director Lee Charnley te an inhmu khawm a, Premier League khelh zel an tum ruh hle. Hemi chungchang hi sawiin Colocinni chuan, "Player leh staff te kan inhmukhawm a, thil kal tawh hi chu theihngilh kan duh. Tunah chuan kan match hmabak 'Cup Final' pathumah 100% a khelh kan tum. Tunah chuan kan inlungrual lohna te dah ṭha ila, Inrinni hian St James Park-ah ṭum dang zawng aia nasain Newcastle tan i thawchhuak ang u," tiin supporter-te ṭawiawmna a ngen.

Newcastle hian Inrinni hian West Brom an mikhual dawn a, QPR leh West Brom an la hma­chhawn dawn bawk. Thawṭanni khan manager ṭanglai John Carver chungah season tluanna rinna an nghah tur thu an puang bawk.