I League Second Division-a champion Aizawl FC Mizoramin I League club kan nei ta

Aizawl FC chuan season tharah I League a khel dawn ta.

Nimin khan Chanmari FC 4-2 in an hneh a, an elpui ber Lonestar Kashmir FC-in Kenkre Sports 1-1 in an draw si a, khelh khat la awm chungin Aizawl FC pakhatna an ni chiang tawh.

Chanchin ngaihnawm

Nimin zing khan Golaghat Stadium-ah Mohammedan SC-in Hindustan FC 1-0 in an hneh a, inkhel a zawh rual hian Chanmari FC tan I League beisei theih a ni tawh lo.

Aizawl FC leh Lonestar-te ang bawkin Mohammedan SC hian I League khelh beiseina an nei zui a. Amaherawhchu tlai inkhelah Lonestar Kashmir leh Kenkre Sports te an inhnehtawk a; Aizawl FC-in Siliguri-a an hneh loh Chanmari FC chu 4-2 a an hneh avangin Round 14 khelh tur la awm mah se umpha thei an awm tawh lo.

Mizoram Premier League awm hnuah Mizoramin football-a state inelna sang ber Santosh Trophy-ah kum 2014 khan an champion a, kum 2015-ah Mizoramin National Games-ah gold medal an la leh a, I League khel turin MPL3 champion Aizawl FC an tling ta.

India ram football-ah Mizoram hming a mawi a, Aizawl FC hnathawh hi Mizoram tan a hlu takzet.

Aizawl FC an par

Hmahruaitu Aizawl FC-in MPL3 best player Lalramchullova an hmang thei tawh a, Kenkre Sports an hneh ṭuma goal khungtu Brandon VL Remdika leh Dinthar FC aṭanga loan hmanga an hawh Laldampuia-te bul ṭantu zingah an tel.

Aizawl FC-in bul an ṭan ṭha a, Liberian forward Alfred Kemah Jaryan cross chu Brandon-a'n minute 9-na lekah goal-ah a chantir a, minute li hnuah Dampuia'n Chanmari keeper Lalruatpuia a pet khum a, a mawi hle.

Darkar chanve hnuah Chanmari-in defender Lalrinchhana la chhuakin Lalrosanga an luhtir. F. Lalrinpuia leh Joel Sunday hmanga Chanmari FC chance neih chu goal luhna khawp a ni lo.

First half tawp hmain Aizawl FC-in Michael Lalremruata an la chhuak a, club hlui hmachhawn turin R. Malsawmtluanga a lut.

Second half pawh Aizawl FC bawkin an thunun a, goal hmahruai siamtu Alfred-a'n minute 51-naah goal a khung a, Dampuia'n goal hnihna a khung lehin minute 60 a nih meuh chuan 4-0 a ni.

Chanmari FC-in an elpui lakah mualpho an tum lo a, Malsawmfela leh Lalrosanga-te goal hmangin an chhang let a; amaherawhchu Aizawl FC ropuina kalkawng an dal zo lo. MPL3 champion 4-2 in an chak.

Mala thukhawchang

Aizawl FC coach K. Malsawmkima chuan, "Bul kan ṭan ṭha a, khelh fuh ni chu ni se first half-ah goal nga khung thei kan ni. Chak phu zawk kan niin ka hria. I League khel turin kan tling hi Pathian ṭanpuina vang liau liau a ni," tiin inkhel chungchang a sawi.

National Games-a Mizoram gold medal lak puitu coach chuan sawi belhin, "Kan thlen chin hi a ropui ka ti. Siliguri-ah kha chuan ka hlauthawng vak lo a, amaherawhchu Golaghat-a kan chetfuh loh kha chuan kan hlauthawng khawp mai. Player-te bulah sawi chhuah chi a nih loh avangin ka tuar ngat ngat a, tunah chuan ka zâng huai tawh. Pathian hnenah kan ṭawngṭai nasa a, Aizawl FC hruaitu leh min ṭawngṭaiputu zawng zawng chungah lawmthu ka sawi," tiin Phase 2 lama pressure a ngah thu a sawi.

President kamchhuak

Aizawl FC president Robert Romawia Royte chuan, "Aizawl FC hlawhtlinna hi khawvel hmun hrang hranga zofate nghahfak I-League Club Mizoramin kan neih ve ngei duhna chhanna a ni. Min ṭawngtaipuitute, Board of Governors te, Advisers te, Coaching staff leh player-te chungah lawmthu ka sawi tak meuh meuh a, MFA chungah ka lawm em em a, kawng engkima min support-tu an ni a, MPL hi kan ṭhatpui tlang a ni. Tunah hian chhiarkawp danin tling tawh mah ila officially-in tihtur tam tak ala awm a, sorkar leh mipui puihna leh ṭawiawmna kan mamawh zel dawn a ni," tiin Vanglaini palai a hrilh.

President chuan, "Uar taka ka sawi duh chu Aizawl FC hi Kristianna thehdarh leh Zofate inpumkhatna atan din thar leh a ni. Tun hmaa Aizawl FC dintute leh a din thar lehna atana pawimawh Mizo Football Management Group-te vanga tun dinhmun thleng thei hi kan ni a, kan hlawhtlinna hi Mizoram tan a ni," tiin a sawi.