Champions League Thlirletna Juventus-in hna chanve an zo phawt

May 13 a Santiago Bernabeu-ah Champions League semifinal second leg an khelh hunah Juventus-in goal khata hmahruai chungin Real Madrid an hmachhawn ang.

Thawhlehni zan inkhelah Juve chuan an mikhual Real chu 2-1 in an hneh. Final lut turin chak zawk Juventus aiin away goal khat nei Real Madrid dinhmun a chhe bik lo.

Kum 2003 hnua a vawi khat nan Champions League final lut turin Juve-in kawng dik an zawh zel. Juventus striker Alvaro Morata chuan a club hlui lakah goal a thun a, Real tan Cristiano Ronaldo chuan goal khat a khung ve bawk.

Stadio delle Alpi chhuahsana Juve Stadium an siam ṭhat hnuah Juve hian European match vawi 18 an khelh tawh aṭangin vawi khat chiah hneh loh an la tawng. Massimiliano Allegri naute hi Serie A champion an nih tawh bakah Italian Cup final an lut tawh bawk.

Inkhel chu

Turin-ah inkhel an ṭan chiahah midfielder Stefano Sturaro bakah Alvaro Morata leh Carlos Tevez te an hlauhawm nghal. Minute kuana leka Tevez goal shot ṭha tak chu Real goalkeeper Casillas-a'n a dang zo lo a, vengtu nei lo Morata chuan hmahruaina goal a pet lut keuh.

Goal khatna luh theih nan hian Italian champion hian vawi 27 zet ball an in pe kual hmasa a, a tawpah Spanish striker Morata-an a hmawr a báwk. Tun season Champions League goal lut tura ball inpe kual hnem ber an ni.

Real tan James Rodriguez a langsarin a khel ṭha a, an goal nawr­tu ber a ni. Colombian midfiel­der thawhrah sengin minute 27-naah Ronaldo-a'n hnai set sawt aṭangin an si phurh sut nan a tauh goal.

Second half-ah goal khat dang kan hmu a, Real Madrid right back Daniel Carvajal chuan box chhungah Tevez a tihtluk avangin penalty a chawi a, Manchester United-a Ronaldo khelhpui Argentine forward chuan chakna goal khung nan penalty hi a hmang.

Inring tawk Ancelotti

Champion lai Real Madrid manager Carlo Ancelotti chuan, "Champions League semifinal khualmuala khelh a 2-1 a chak loh hi result chhia a ni hran lo ang. A chhan chu keimahni khelmualah minute 90 dang kan la khelh leh dawn vang a ni. Zanin khan kan game ṭha ber kan khel chhuak lo chiang a, James leh Marcelo te vanneih ni chu ni se goal khat aia tam thun theihna hun chu ka nei chiang. Engpawhnise, inkhel ala tawp lo," tiin Juventus chu lehthal theih ala inring hle.

Allegri a lawm

Juventus manager Massimiliano Allegri chuan an result-ah a lawm­thu sawiin, "Champions League game level sang takah ṭha taka khelin hnehna kan chang thei hi ka lawm hle. Player ṭha awm khawmna Real te ang kan khel a nih chuan tihsual a thiang loh bakah chet fuh a angai bawk ṭhin. Zanin khan chumite pahnih chu ka tih hlawhtling thei," tiin a sawi.