BR Studio MFA Inter Village Futsal : Dawrpui hnehin Zonuamin final an lut

BR Studio MFA Inter Village Futsal Tournament semifinal hmasa zawkah Zonuam chuan Dawrpui 6-1 a hnehin final an lut. October 29, Thawhlehni zan inkhelah hian Zonuam tan Peter Lalzuiliana'n hattrick a siam bakah Lalṭhazuala'n (Puitea) goal hnih khungin Lalhruaizela'n goal khat a khung ve bawk.

Nizan khan R. Dengṭhuama Indoor Stadium-ah Chanmari leh Durtlang ten semifinal hnuhnung zawk an khel a, result kan hre hman lo. Final hi November 1, Zirtawpni zanah khelh a ni ang.

Goal 7 a lut

Futsal-a tawnhriat nei ṭha zawk Zonuamin bul an ṭan ṭha a, second 19-na lekah Peter-a'n vei lam aṭanga khalh pheiin amah vengtu Dawrpui player a bum hnuah a pet goal nghal.

Dawrpuiin goal an chhuah hma avangin goal khung tuma an nawr a ngai a, Zonuamin futsal player ṭha Puitea an kawl. Minute ruknaah Puitea hian ngil taka khalh chhuakin goal-ah kilah a pet a, Dawrpui keeper-in a dang thei lo.

Minute kuanaah Dawrpuiin siphurh an sut ṭhen a, Gabriel Zosangliana'n a tlawh lut ṭha hle. First half-ah goal a lut tawh lo a, second half-ah tawnhriat nei danglamna a lang. Dawrpui tlarhnung an muthlu a, Puitea'n rang taka 'kick in' petin minute 32-naah Peter-a'n hnai tak aṭangin a khung.

Team pahnih inhnehtawk mah se Dawrpuiin inkhel ṭantirha goal hnih an chhuah an tuar a, hun tawp lamah goal khung an tum luatah an chhuah belh leh bawk.

Minute 36-naah Peter-a'n keeper chhuak hmuin halfway line thlen hma aṭangin a pet goal a, second rei lote hnuah Hruaizela'n freekick aṭangin a khung. Zonuamin set piece an hmang ṭangkai a, Puitea'n freekick aṭangin minute 37-naah a khung a, 6-1 in inkhel a tawp.

Boruak a hot ṭan

Semifinal a nih meuh chuan entu mipui an awm ṭan a, inkhelh kal hmang pawh a inthlak. Tawnhriat nei player-te danglamna a lang a, inkhel inhnehtawk takah Zonuam 6-1 ngawtin an chak.

Zonuam captain Puitea chuan, "Kan inbuatsaihna a ṭha a, practice-naah kan kim ṭhap ṭhap a, tunah a rah a rawn chhuak niin ka hria," tiin inkhelh banah a sawi.