Man United manager tur Amorim?

Manchester United-in Erik Ten Hag thlak nan Ruben Amorim an duh tih an nemnghet a, zângnadawmna atana Sporting Lisbon pek ngai zat €10mtd pawh pek an inhuam. Mahse, Amorim-a'n thutlukna a la siam lo.

Thawhlehni zan khan Sporting hian Taca da Liga quarterfinal-ah Nacional 3-1 in an hneha, Morten Hjulmand-a'n goal hmahruai a khung hnuah Viktor Gyokeres-a'n goal hnih a khung belh.

Inkhelh bana press conference-ah Pathianni zanah Old Trafford-ah i ṭhu dawn em? tiin an zawt. Amorim chuan, "Hetah hian ka la awm dawn tih ka chiang," tiin a chhang a, Manchester United a zawm dawn a nih pawhin tunkarah chuan a zawm mai dawn lo.

Chutihrualin Amorim a hlim a, Man United nena sawi zawm nuam a ti, tih a hmelah a lang thei. Man United hian an mualah Chelsea an mikhual dawn a, Nistelrooy hnuaiah an khelh a rinawm.

Amorim chungchangah Man United leh Sporting ten inbiakna an nei tawh a, English club hian zângnadawmna pek an inhuam. Portuguese club pawhin Man United an dawr ngei tih an nemnghet tawh.

Khawthlang media-te tarlan danin Man United hian Amorim hi a thawhpui tur coaching staff chungchang an sawipui tawh niin a tarlang. Portuguese manager hi Ten Hag thlaktu tur ni ngeiah a ngaih theih.

Amorim hi kumin April thla khan West Ham zawm châkin London club nen indawrna a neihpui a, inremna an nei thei ta lo, David Moyes thlak nan Julen Lopetegui an la leh ta zawk. Liverpool nen pawh Amorim hi sawi zawm ni mah se Reds-in Arne Slot an thlang.

English club pahnihin an biak zet hnua an lak tak loh Amorim hi Man United an hel mek a, la turin an dinhmun pawh a ṭha. Kum 39 mi Amorim hi Benfica aṭanga inzir chhuak niin Portugal tan pawh inlan pha mah se inhliam vangin kum 32 mi niin inkhelh a chawlhsan.

Inkhelh a chawlhsan hnuah Amorim hian coaching licence nei turin Lisbon Football Association a zawm a, 2018-19 season khan third division club Casa Pia-ah bul a ṭan.

Hemi hnu hian Sporting Braga reserve team a enkawl chho a, January 2019 aṭangin senior team a enkawl ṭan. Sporting-in March 2020-ah manager Silas banin Braga aṭangin Amorim hi €10 mtd-in an la chhuak.

Amorim hnuaiah Sporting hian Primeira Liga leh Taça da Liga nomawi vawi hnih ve ve an chawi a, tun season-ah pawh league hmahruaitu an ni mek. Portuguese manager Amorim chuan, "Man United aṭangin sawmna ka dawng tih ka pawm a, chutihrualin ka hmalam hun chungchangah thutlukna ka la siam lo. Ka dinhmun ka tih chian hunah keimah ngeiin ka hmalam hun tur ka sawi ang. Ka kutah thutlukna a awm," tiin English club-in an sawi ngei tih a nemnghet.

Man United captain Bruno Fernandes hi Sporting Lisbon captain hlui a ni a, Portuguese club striker Viktor Gyokeres-a'n season liam ta khan goal 43 khungin tun season-ah goal 16 a khung tawh. Amorim hian Gyökeres hi Old Trafford-ah a hruai tel thei a nih chuan a hlutna belhchhahin a awm ang.

Red Devils hian nizan khan League Cup last 16-ah Leicester City an hmachhawn a, Ruud van Nistelrooy hnuaia an result kan hre hman lo. Tuna thuthang awm danah chuan club legend Nistelrooy hi Old Trafford-ah a cham zui loh hmel hle.