Jota a la chawl rih dawn

Liverpool fan-ten chanchin lawmawm lo hriat tur an nei a, forward Diogo Jota chu a nakruh hliam vangin November international break zawh thleng a chawlh a ngai dawn.

Reds-in 2-1 a Chelsea an hnehna inkhelah Jota hi Blues defender Tosin Adarabioyo nen an intauh palh a, a hliam vang hian lakchhuah zui niin, Champions League-a RB Leipzig (1-0) an hnehna inkhel leh league-a Arsenal (2-2) an inhnehtawkpuina inkhelah pawh a inlan lo.

Liverpool manager Arne Slot chuan a player inhliamte chungchang sawiin, "Conor Bradley-a'n training a zawm tawh a, Jota, Alisson, Harvey Elliott leh Federico Chiesa ten an la zawm lo thung.

"Jota hi international break zawhah a lo kir thei dawn chauh a, Elliott pawh a ni tho ang," a ti a, Reds fans tan hriat a nuam lo ang. Goalkeeper Alisson hi malpui hliam vangin kar hnih zet a chawl tawh a, ani pawh hi international break zawh lamah a lo kir chauh dawn.

Elliott hi ke phah hliam vangin a chawl mek a, Chiesa hian Juventus aṭanga Liverpool a pan hnuah match thum chauh la khelin, hliam vangin a chawl zui .

Kum 27 mi Jota hian tun season inelna hrang hrangah Reds tan match 10 khel tawhin goal li a khung a, assist vawi hnih a nei bawk. International break hmaa a lo kir dawn lo a nih chuan match li tal khelh loh tur a la nei tihna a ni.

Reds hian nizan khan League Cup round of 16-ah Brighton & Hove Albion an hmachhawn a, November 11-19 inkara international break neih hmain league-ah Brighton leh Aston Villa an mikhual ang a, Champions League-ah Bayer Leverkusen chu Anfield-ah an lo mikhual bawk ang.