Saints leh Brentford an chak hram

League Cup round of 16 chu Thawhlehni zan aṭang khan khelh ṭan a ni a, Premier League club pahnih Southampton leh Brentford ten an khingpui ve ve hnehin quarterfinal an lut.

Saints hian Stoke City mikhualin, hun tawp dawna James Bree goal hmangin 3-2 in an chak hram. Saints hian Taylor Harwood-Bellis leh Adam Armstrong (penalty) hmangin 2-0 in hma an hruai reng a, Stoke hian Ashley Phillips leh Thomas Cannon hmangin an chhanglet.

Hun tawp nan minute hnih chiah a awm tawh tihah Bree chuan Saints tan a khung leh a, an chak. Brentford pawhin 1-1 in Sheffield Wednesday an inhnehtawkpui a, penalty-ah 5-4 a chak zuiin quarterfinal an lut.

Saints an chak

St. Mary's Stadium-a inkhelah Southampton-in inkhel thunun mah se, hnehna chang turin vanneihna an mamawh. Minute 19-naah Harwood-Bellis chuan goal hmahruai khungin, Matheus Fernandes-a corner aṭanga ball kal chu a tauh lut.

Minute 35-na a ni a, Saints hian an goal hnihna an khung zui. Jaden Dixon-a'n Yukinari Sugawara laka a penalty chawi chu Armstrong-a'n goal-ah a chantir a, 2-0 a ni. Mahse, Championship club Stoke-in tlawm an tum bik lo - minute 45-naah Phillips chuan si phurh a sut ṭhen.

Saints-in ball chang tam mah se, Stoke an huai tlat. Cannon hmangin khualmualah si phurh an sut zo a, goal dang a luh lawk loh avangin penalty pet a ngai dawn niin a lang hman. Mahse, mamawh hunah tak Bree a inlar a, minute 88-naah chakna goal a khung.

Brentford vannei

Premier League club Brentford-in Championship table-a 13-na ni mek Sheffield Wednesday an mikhual a, inkhel thunun mah se, chak turin vanneihna an mamawh - penalty hmanga chinfel a ni.

Brentford hian minute 11-naa Kevin Schade-a goal hmangin hma an hruai a, minute 57-naah Djeidi Gassama chuan si phurh sutna goal a khung. Carabao Cup-ah final hma chu extra time khelh a nih ngaih loh avangin penalty pet zui a ni.

Premier League club tana pettuten an chhuih luh vek laiin Sheffield tana pet hnuhnung ber Liam Palmer chuan a chhuih lut lo a, penalty-ah 5-4 a chakin, Brentford-in a thiam pariat zingah an hming an ziak kai.