Vawiinah Tour de Hmuifang 2024

Mizoram Cycling Association (MiCA) leh Tourism Department ṭangkawpin an buatsaih - Tour de Hmuifang 2024 chu tukin zing hian Tourism minister Lalrinpuiin Vanapa Hall kawt aṭangin a vai liam dawn a, tlan kawng tawp Hmuifangah kharna hun hman a ni ang.

TDH24-ah hian Thirsakawr khalha intlansiak turin mi 48-in hming an pe a; inelna hi Master, Elite, Junior, Road leh Women category-ah ṭhen a ni. Intihsiakna rothap leh kawng thui ber tur elite category-ah mi 11 an inel dawn a, Mizo tlangval Mesak Vanlalvena elpui turin India rama rider ṭha Ronel Singh leh Adonis Tangpu bakah Meghalaya aṭanga rider ṭha Kevin John te tel tur hian ngaihven a hlawh phah.

Elite tlan kawng hi Vanapa Hall aṭangin Muallungthu - Tuirial - Khumtung, - Hmawngkawn - Chawilung - Lamchhip lamah tlan zelin Hmuifangah a tawp dawn a, a thui tham hle.

Tun hnaiah MiCA-in nasa takin hma an sawn a, Red Bull Tlangruam hlawhtlinna kawngah pawh tha an thawh hlawk hle. Tun ṭum Tour de Hmuifang hi a vawi lina a ni a, kum telin ngaihven a hlawh zel.

Tour de Hmuifang

Vawi 1-na: October 2, 2021 khan Gandhi Jayanti denchhena neih a ni a, Mualpui Zero Point aṭanga Hmuifang thleng an intlansiak. District hrang hrang, Aizawl, Lunglei, Kolasib, Champhai, Serchhip leh Saitual aṭangin rider 72 an tel. Category pahnihah inelna a awm a, kum 35 hnuai lamah Mesak Vanlalvena, Sihfa khua (darkar 2:14) chu pakhatna niin kum 35 chunglamah Lallawmsanga, Mission Veng (darkar 2:35) chu pakhatna a ni thung.

Vawi 2-na: November 18-19, 2022-ah Tour de Hmuifang vawi hnihna hi neih a ni a; Aizawl-Hmuifang leh Thenzawl-Hmuifang inkar, 100km a thui intlansiak. Elite Category-ah Mesak Vanlalvena (4:30:01) bawk pakhatna niin Master Category (88km)-ah David Rualzakhuma (4:34:27) leh Junior Category (88km)-ah Lalruatfela (4:21:58) te chu pakhatna an ni.

Vawi 3-na: World Tourism Day 2023 denchhenin September 23, 2023-ah buatsaih a ni a, Junior, Elite, Master leh Road (Open) category bakah a vawi khat nan hmeichhe category (exhibition) hran buatsaih a ni bawk. Junior leh Masters category te hi Maubuang khawchhungah lutin, Ṭhiak khawchhungah lut lehin Hmuifangah an thleng a. Open (Road) hi Hmuifang kawngdung pangngaiah an tlan a, Elite hi Maubuang Damdiai atangin Changte-ah an chhuk a, Samlukhaiah lawnin Chamring lam aṭangin Hmuifang an lut thung.

Intlansiaknaah hian hming pe 64 zingah tlan zat mipa 54 leh hmeichhe panga an tel a, state pawn aṭangin mi pahnih an tel. Junior (kum 18 hnuai lam)-ah Vanlalruata, Tuirial pakhatna a ni a, Masters (kum 35 chin chunglam)-ah Peter Zohmingliana, Bungkawn chu pakhatna a ni thung. Open (Road Category)-ah Dr. Lalrinawma, Hunthar pakhatna a ni a, inelna hautak ber Elite category-ah Richard Zorinsanga, Thenzawl Field veng pakhatna a ni bawk.