Alcaraz tan buaina a awm lo

Carlos Alcaraz chuan Thawhlehni zan khan Rolex Paris Masters a khel ṭan, a match hmasa berah Spanish star hian Nicolas Jarry chu 7-5, 6-1 a hnehin a chak nuamsa hle a, harsa lo takin last 16 a inhlangkai.

Centre Court-a inkhelah Alcaraz hian Chilean tlangval Jarry lakah winners vawi 13 a vaw chhuak a, a tihsual vanga a khingpui point a pek zat chu paruk lek a ni thung, a khel ṭha hle.

Seeded pahnihna Alcaraz chuan, "Season hmasa kha chuan Paris Masters kan khelhna hmunah khan ball a kal muang lutuk a, ka tan inkhelh a harsa, kuminah erawh a boruak a danglam ta.

"Season tawp lam a ni tawh a, player kan chau tlang tawh. Hetiang karah hian ṭha taka a hnu khar thei nih ngei ka tum," a ti. Nimin tlai thleng kha chuan last 16-a a tum tur hi a la chiang thei rih lo a, midang inkhel result a nghah a ngai.

Alcaraz a chak lai hian world number 1 Jannik Sinner erawh a inhnukdawk thung. Italian tlangval hi inelna hmachhawn turin a hmunah a thleng vek tawh a, mahse damlohna vangin a inkhel thei leh ta lo.

Tun dinhmunah Alcaraz hian Sinner hi world ranking lamah point 4300 in a phak lo mek, tun ṭum hi Alcaraz tan an inkar tihzim theihna remchang a ni thei tura ngaih a ni a, kawng erawh a awlsam bik kher lo ang.

Inkhel dangah British tlangval Jack Draper chuan Jiri Lehecka chu 7-5, 6-2 in a hneh. Seeded 13-na Holger Rune pawhin Italian player Matteo Arnaldi chu 6-4, 6-4 in a hneh a, seeded pakuana Alex de Minaur chu Mariano Navone lakah 7-5, 6-1 in a chak bawk.

Tun ṭum inelnaah hian champion lai Novak Djokovic chu a lo inhnukdawk tawh a, midangin nomawi an chawi thei dawn tihna a ni. Season kal lai tawp hmain ranking sang zual pariat inelna ATP Finals an la hmabak bawk a ni.