Villarreal an chak nuamsa

Copa del Rey lamah Villarreal-in nuamsain hnehna an chang a, first round inkhelah 6-1 ngawtin Poblense an sawp - Spanish fifth division club lakah hian Ayoze Pérez chuan hattrick siamin, Ramon Terrats, Pau Cabanes De La Torre leh Pape Gueye ten goal khat ṭheuh an khung a, Poblense tana Aitor Pons goal khung chu mualpho zualpui khuhna chauh a ni.

Thawhlehni zana La Liga club inlan dang zingah Real Valladolid chuan 4-1 in regional league club Astur CF an hneh a, Rayo Vallecano chuan 5-0 in sixth division club Villamuriel an sawp a, Alaves-in fourth division club Compostela chu 1-0 in an hneh bawk.

Copa del Rey hi preliminary round aṭanga khelh ṭan niin, tuna an khelh hi first round a ni a, he round-ah hi chuan Supercopa de España khel tur club pali tih loh chu La Liga club-te an inlan vek tawh.

Spanish Supercup khel tur club, Copa del Rey champion lai Athletic Bilbao, runners-up Real Mallorca, La Liga champion Real Madrid leh pahnihna Barcelona ten round of 32 aṭangin Copa del Rey hi an khel ve leh ang.

Zanin dar 11:30 hian Atletico Madrid pawh an inlan dawn a, sixth division club UE Vic chu khualmualah an lenchilh ve leh dawn a ni.