Second round-ah Dortmund an tla

Borussia Dortmund chuan VfL Wolfsburg 1-0 a hneh loin German Cup second round aṭangin an tla, goal awmchhun hi Jonas Wind-a'n extra time zawh dawn hnai lama a khung a ni.

Tun hnaiah Nuri Sahin-a enkawl Dortmund hi an che chhe hle, kar hmasa khan Champions League-ah Real Madrid an ngam lo a, Bundesliga khel zuiin Augsburg an hneh lo - tunah German Cup aṭanga hnawhchhuah an ni leh ta bawk.

Dortmund midfielder Pascal Gross chuan, "Hun rei tak chhung goal kan venghim thei a, a khung theihna remchang kan nei bawk. Chutiang karah chuan a tawp dawnah goal kan chhuah a ni a, a pawi takzet.

"Hliam kan neih nual avangin kan ṭhat dan takin kan khel lo, chhuanlam chu a awm thei ang. Mahse, chhuanlam siam avangin result erawh a danglam phah lo, mitin kan insiamṭhat a ngai," tiin a sawi.

Inkhel dangah champion lai Bayer Leverkusen erawh an chak, coach Xabi Alonso leh a naute hian second division club Elversberg chu 3-0 a sawpin round sang zawk an inhlangkai thung.

German champion Leverkusen tan hian Patrik Schick chuan goal hnih a khung a, goal khat dang hi Aleix Garcia khung a ni thung. Alonso chuan a naute khelh dana a lungawi thu sawiin, hmabak erawh a la thui tih a sawi bawk.

Team ṭha zinga mi RB Leipzig pawh an chak. Tun season Bundesliga table lama pahnihna ni mek RB Leipzig hian anmahni ang bawka Bundesliga club St Pauli chu 4-2 in an paltlang a ni.