Punjab khelmualah Chennaiyin

Indian Super League pawh khelh chhunzawm zel a ni a, zanin dar 7:30 hian Mizo player awm lohna Punjab FC khelmualah Mizo player pathumin hmun pawimawh an channa Chennaiyin FC chu an lenglut dawn.

Season hmasa aṭanga ISL khel ṭan ve chauh Punjab hian beisei phak baka ṭhain season an hmang a, an match hmasa pathumah an chak vek. Mahse, October 18 khan an league match hnuhnung berah anmahni ang thoa tlawm la nei lo Bengaluru an lenchilh a, 1-0 in an tlawm.

Bangalore club an ngam loh hnua an match hmasa berah tawnhriat nei ṭha Chennaiyin an mikhual dawn. South Indian club hian league match nga khel tawhin vawi hnih an chak a, vawi hnih draw neiin, vawi khat an tlawm.

Scottish coach Owen Coyle-a enkawl team-ah hian defender Laldinliana Renthlei leh PC Laldinpuia bakah midfielder Lalrinliana Hnamte te an tel a, hmun pawimawh an chang vek.

Bethlehem Vengthlang/Samtlang defender Dinpuia leh Dungtlang/Chanmari tlangval Terina ten match nga an khelhah bul an la ṭan vek a, Dinliana pawhin match liah bul ṭanin, match khat erawh hrem vangin a khel thei lo thung - zaninah bul ṭan tura a lo kir leh a rinawm.