Zanin aṭangin Zudio LPS Pro Fight

Zudio LPS Pro Fight 2024 chu zanin dar 8:00 aṭangin LPS Arena, Falkland-ah ṭan a ni dawn a, ṭan zan hian bout pariat a awm nghal ang. Inelna hi zan tinin a awm chho dawn a, boxing inkhawmpui lian hian mipui ngaihven a hlawh ang.

Pro Fight hi LPS 1 leh YouTube Channel (member tan)-ah a en theih dawn. Inelna ṭan zan hian LPS neitu Biakveli leh Pro Fight ring announcer David L Fanai sunna hun hman a ni ang a, LPS Youth Icon 2024 Lalsangliana (Taitea) a zai ang a, inelna ṭan nghal a ni ang. Inelna ṭan zan leh November 2, Inrinni zanah en man lak a ni dawn lo a, zan dangah erawh en man hi Rs 50 a ni thung ang.

Zudio LPS Pro Fight-ah title chuh turin boxer 283 ziah luh an a ni a, champion lai pathum–Laldinsanga (bantam), Lalruatzela Hauzel (welter) leh C. Lalhruaitluanga (middle) nen an vaiin boxer 286 an tel dawn a ni.

Weight hrang pangngaah Mizoram pawn aṭangin tel an awm vek a November 23-ah weight hrang pangaah round of 16 zawh vek a ni dawn a, November 25-27, 2024-ah quarterfinal, November 29 leh 30-ah semifinal chhunzawmin December 3-ah title chuh tur zawnna final a ni dawn a, hetah hian Mizo hmeichhe boxer ṭhate tan hun siamsakin exhibition bout ṭum hnih a awm tel dawn a ni.

Fly champion lai NT Lalbiakkima a tel dawn lo a, welter-ah light champion lai HC Lalramfela a insawn bawk. Title humhim tur an awm loh avangin fly leh light-ah a hranpain title chuh tur zawnna final a awm dawn lo a, semifinal-a chak pahnihin champion nih an inchuh zui nghal dawn.