Coach thar nei United-in Chelsea mikhual dawn

Manchester United chuan coach atan Ruben Amorim an lakluh thu an puang ta a, kum 39 mi manager hian November 11-ah Old Trafford a pan ve chauh dawn thung - chumi awmzia chu Pathianni zan dar 10:00-a Chelsea an mikhual hunah coach lailawk Ruud van Nistelrooy-a'n United a enkawl ang.

Sporting Lisbon aṭanga United pantu Amorim hian June 2027 thleng atan contract a ziak a, November 11-ah United coach hna a chelh ṭan chauh dawn avangin Nistelrooy-a'n Chelsea bakah Europa League-a PAOK Athens an mikhual hun leh, November 10 zana Leicester City an mikhual hunah Red Devils hi a la enkawl rih dawn.

Amorim hi kum 2013-a Sir Alex Ferguson-a'n United a chhuahsan hnua Red Devils manager nghet parukna chiah a ni a, United chuan, "Ruben hi European football-a coach ṭhangduang leh ngaihven hlawh ber pawl a ni," an ti a, Amorim an chang thei chu an lawm hle.

Portuguese coach la lut tur hian United hian pound maktaduai 8.3 an seng a, Amorim hoa an match hmasa ber chu Ipswich Town nen November 24 zanah an khel ang a, Old Trafford-a a match hmasa berah Norwegian club Bodo/Glimt chu Europa League match khel turin an mikhual ang - Pathianni zan atan erawh Nistelrooy chu mawhphurtu a ni.

Theatre of Dreams

Manchester United fan-ten an khelmual Old Trafford chu an duhthusam ennawm chhuahna hmun ang hialah an ngai a, a hming lemah duh takin 'Theatre of Dreams' tih an phuah. Mahse, Ten Hag-a hnuaiah he khelmual hi mangchhia thlenna hmun ang mai a ni!

United hian tun season-ah league match kua khel tawhin, an chak aiin an tlawm a tam zawk! Vawi thum an chak tawh a, vawi li tlawm neiin, vawi thum an khingpui an inhnehtawkpui. United ang club liana inchhal tan chuan a ṭha tawk lo a ni mai lo a, a mualpho thlak.

Hei mai a ni lo - hmelmate hlauhthawnna ṭhin Old Trafford hi elpuite nuam tawlna hmun a chang ta mai em ni chu aw, tih mai tur a ni a, club lian an mikhual tawhah Liverpool chuan 3-0 in an sawp a, Tottenham Hotspur-in heti zat tho hian an sawp bawk.

United fan-ten hlim taka an zai ṭhinna stadium hi mittui hruk nan an hmang ta a, hmelmate diriamna chu an tan na tak a ni. Pathianni zan aṭangin a bul ṭan ṭhat leh an tum dawn a, player a nih laia Red Devils fan-ten mang rama chentir fotu Nistelrooy hian beiseina ramah United fan-te lentir leh a duh dawn - hna a lo thawh ṭhat lawk chuan Amorim tan hna a awlsam sawt ang.

A ṭha tawk lo

League lama United result hi a ṭha tawk lo a ni mai lo a, mangchhia ang hiala chhal tham a ni. Hei hi dah ṭhain, inelna dang lo thlir ta pawh ni ila, Europa League match thum an khelhah an la chak zo lo vek!

Hneh ngei tura ngaih FC Twente (1-1) an inhnehtawkpui hnuah, FC Porto (3-3) leh Jose Mourinho enkawl Fenerbahce (1-1) an inhnehtawkpui leh a, a hnua Ten Hag-a thusawi chu, "Porto leh Fenerbahce kan draw a, hneh kan harsatzia kan pholang," tih a ni.

United coach meuh ṭawngkam atan chuan a zahthlak a, club lian inti tan a tlawm thlak. Heti chung hian United thuneituten an dawhtheihna Ten Hag-a chungah an lantir zel a, West Ham an ngam loh leh takah chuan an dawhthei reng ta bik lo.

Pathianni zanah chuan 'pressure' awm miah loin Nistelrooy-a'n team a kaihruai thei dawn a, coach lailawk a nih hun chhung rei lo têah 100% record neih a duh dawn - hlauh nei loin Chelsea a hmachhawn ang.

Chelsea beiseina

Blues-in Mauricio Pochettino bana Enzo Maresca an lakluh khan tam takin rin an harsat a, Blues thuneitute an dem. London club hi ṭum dang ang thoin an bazar zui nghek bawk a, thil tum tak hi hriatthiam a har hle.

Mahse, coach thar Maresca-a'n season ṭantir aṭangin duhdan nghet a nei a, a player chhawr loh tur thlengin, player langsar pawh ni se, huaisen takin a tichiang nghal a, a tumah a chiang tih a pholang.

Maresca hnuaiah Blues-in khelh dan phung nghet an nei a, league table-ah pawh pangana an ni mek. 'Season an hmang ṭha lo' tia i sel dawn a nih chuan fak hlawh leh champion tura rinkai Arsenal an phak lohna hi point khat chiah a ni, tih theihnghilh suh.

A tawi zawnga sawi chuan match hnih khat lekah Chelsea dinhmun hi a la danglam dawrh thei tihna a ni a, table-ah pangana ni mah se, an 'point' hmuh zat thlirin Blues hi an chhe lo tih a lang.

Mahse maw...

Chelsea kan fak rualin harsatna an nei - club lian an hmachhawnin Maresca naute an che hleithei ṭhin lo a, season thara Champions League khelh an duh a nih chuan hei hi United aṭanga an thlak danglam a ṭul.

London club hian tun season-ah 'Big Six' club Manchester City (2-0) leh Liverpool (2-1) hmachhawn tawhin an tlawm ve ve a, team ṭha Newcastle United chu league lamah 2-1 in hneh mah se, League Cup-ah 2-0 in an ngam lo zui bawk.

Hetihrual hian Maresca-a'n League Cup last 16-ah player ṭha ṭhenkhat a awltir a, tun season-a goal ruk khung tawh Nicolas Jackson phei chu squad-ah pawh a awm lo a, Cole Palmer chu bench-ah a ṭhut tluantir bawk.

United-in chak an duh chuan Palmer dah ṭhat hi a pawimawh hmasa tur a ni. Chelsea attacking midfielder hian tun season inelna hrang hrangah match 11 khelin goal sarih a khung a, assist vawi nga a nei - Old Trafford-a goal khung a châk ang.