MPL khel tur Lawngtlai club MLS

MLS FC chuan MPL12 Qualifier-ah an champion avangin Mizoram chhunga football inelna sang ber an khel dawn. Lawngtlai club hian nimin inkhel pawimawh takah Kanan FC 2-1 in hneh lo mah se Ramhlun North FC 2-0 a an hneh avangin goal difference hmangin table chung berah an awm.

Vanlalpeka enkawl MLS FC hi MPL khel thei club 23 an ni a, Aizawl pawn aṭanga MPL khel tura inpetling pangana an ni a, Lawngtlai aṭanga MPL khel thei club hmasa ber an ni bawk. MLS FC hma hian Aizawl pawn aṭangin Reitlang FC, Lunglei FC, Project Veng FC leh SYS FC ten MPL hi an lo khel tawh a ni.

Inkhel a nung ṭha

Kanan FC-in MPL ṭantirh aṭangin football-a Mizoram chhunga inelna sang ber khelh tumin hma an la tawh ṭhin a, an hun ṭha bawhpelh an tum lo. Chutihrualin Lawngtlai club hian nikum khan playoff hmachhawn ṭanin coach Peka hoin kum zawna hlawhchham an tum lo.

Goal hnih tal khung mamawh Chawngthansanga hoten attacking football an khel a, MLS FC-in goal venhim hna an thawk a, tlarhnungah player an inhnawh hnem hle. ADFA First Division champion Kanan FC-in minute 30-naah goal an sual chhuak a, dinglam aṭanga ball vawrhluh chu MLS player Rothangliana'n tauh chhuak ṭha tawk loin hnai tak aṭangin C. Lalnunsanga'n a tauh lut.

Goal khatin Kanan a ti phur a, first half-ah goal dang khung belh thei lo mah se minute 63-naah midfielder C. Lalthlanawma'n box pawn aṭangin a pet goal. 2-0 in inkhel tawp se, Kanan FC-in MPL an khel dawn.

Mahse, MLS lamin an dinhmun an hria a, an khelh dan kalhmang thlak hlawkin attacking football an khel a, risk an la sual lo. Minute 69-naah buai nuaih karah Rothangliana'n box pawn aṭangin MLS tan goal pawimawh a khung a, goal an venhim zui avangin MPL khelh theihna goal a ni hial.

Pathian a fak

Lawngtlai aṭanga footballer leh coach chhuak tawh a, sulhnu nei ṭha ber tia chhal ngam Vanlalpeka tan mellung pawimawh a ni a, MPL-a MLS a kaipui avangin Pathian a fak.

Peka chuan, "Pathianin ṭawngṭai saktu min pe hnem a ni. Pathian bak chhuan tur kan nei lo. A khaw nawtin kan ṭawngṭai a, kan ṭawngṭaina chhanin a awm.

"Kanan lamin game engkim thunun mah se Pathianin kan goal min venhimsak. Kan mamawh tawk chiah chiah goal min pe bawk," tiin Vanglaini a hrilh.

Nikum MFA Cup-ah Peka hian MLS FC hi a champion pui a, kuminah player ṭha eng emaw zatin an chhuahsan chungin MPL khel turin a tlinpui.

MLS hi club neitu fate hming chawia phuah a ni a; Meideilin, Larry leh Sebastian tihna a ni.

Beisei la nei Kanan

Kanan FC-in goal hnih an khung hnuah goal an chhuah a, 2-1 a nih hnuah pawh chance ṭha an bawhpelh. Mahse, Chawnga hoten MLS FC an hneh avangin Ramhlun North aiin goal difference a ṭha zawk a, playoff-ah Chawnpui FC an hmachhawn dawn.

Chawnpui hi Lalrindika Hmar enkawl a ni a, November 4, Thawhṭanni leh November 6, Nilaini hian playoff an khel dawn. Away goal rule a awm dawn lo a, vawi hnih khelha chak zawk zawkin MPL an khel ang. Chak zawk an awm lo a nih chuan penalty shootout hmangin chak zawk zawn a ni ang.