Contract vangin kan buai lo - Slot

Liverpool player pathum, Reds tana pawimawh ṭhiau, Virgil van Dijk, Trent Alexander-Arnold leh Mohamed Salah ten season tawp rualin contract an hmang zo dawn a, he thu buatsaih a nih lai thleng hian player pathumten contract thar an la ziak lo!

Reds captain VVD-a'n contract thar chungchangah indawrna a awm mek thu a sawi a, Alexander-Arnold hi Real Madrid nen sawizawm a ni a, Salah pawh a kum a tam deuh tawh avangin Reds hian an chelh dawn lo nia sawi a awm.

Hetianga player langsar pathum contract chungchang hi team tibuai thei thil a ni a, mahse, coach Arne Slot chuan an buai phah loh thu a sawi thung. Dutch coach chuan, "Tuna an khelh ṭhat ang hian khel lo ngat se, contract buaina hi player leh team nghawng thei thil a ni.

"Mahse, ka player-te hi an puitling em em a, chutiang harsatna chu engmah kan nei lo. Tun dinhmunah chuan player pathum hi an buai lo a, Virgil-a'n a sawi ang khan inbiakna a kal mek e. Keini chuan contract ni loin, thil dang kan sawi ho ṭhin," a ti.

VVD-a'n a hma hun a hriat loh thu a sawi chungchang chu Slot chuan sawifiahin, "Contract a la ziak lo miau a, a hma huna thil thleng tur a hriat loh thu a sawi kha chu a dik chiah a ni." a ti a, a player thusawiah lak kawih tur awmin a hre lo.

Liverpool hian an league match hnuhnung berah Arsenal (2-2) an inhnehtawkpui a, pakhatna aṭanga pahnihnaah tlain, hmahruaitu Manchester City chu point khatin an phak lo mek.

Reds hian League Cup khel zuiin, last 16-ah Brighton & Hove Albion chu 3-2 in an pet chhuak - Brighton hi zanin dar 8:30-ah league match khel turin an mikhual ve leh ang.