12th David Mem Chess C'ship Grand Master Sriram a champion

Ni thum chhung awh 12th David Memorial Chess Championship 2024 chu nimin khan Ramhlun Indoor Stadium-ah khelh zawh a ni a, FIDE Rating Tournament-ah hian grand master Sriram Jha, LIC of India chu a champion.

Sriram Jha chuan, "Mizoram nuam ka ti a, MCA-in inelna ṭha tak an buatsaiha tel tura min sawm avangin ka lawm. Mizo chess player-te an ṭha a, hma sawn zel turin theihna an nei," tiin a sawi.

Inelna senso hi Tuma Glass Centre, Lower Chanmariin an tum a, Mizoram Chess Association (MCA) buatsaih a ni a. Inelna ngaihhlut hlawh takah hian player 108 an tel a, Mizoram district pakua bakah state pawn player 10 ten inelna hi an hmachhawn.

AICF hruaitu mi pahnihin inelna hi an chhim a, chief arbiter hi Anupam Bhattacharjee, International Arbiter (I.A), Agartala niin senior national arbiters P. Lalchuanpuia leh Micky Lalmuanpuia ten an puibawm a ni.

Championship kharna hi MCA president Er. Lalchhuana'n a kaihruai a, inelna sponsor-tu David Lalrinawma (L) nupui Lalzampuii'n (Tuma Glass Centre neitu) thu sawiin an chhungkuain lawmman a sem nghal bawk.