Mi zawng zawng tihlawm theih a ni lo - Klopp

Liverpool coach hlui Jurgen Klopp chuan Red Bull a zawm chungchanga sawiselna a tawh chu a chhanglet a, German coach chuan, "Mi zawng zawng inlungrual tlanna tur hna thawh chu har tak a ni," a ti.

Klopp hian season zawh rual khan Liverpool chhuahsanin Red Bull hi a zawm a, head of global soccer dinhmun luahin, Red Bull-in khawvel hmun hrang hranga club an neihte chu an inrelbawlnaah thurawn a pe ṭhin dawn a ni.

Austrian company hian RB Leipzig bakah an ram club Red Bull Salzburg, Major League Soccer club New York Red Bulls leh Brazilian club Red Bull Bragantino te an nei a, tun hnai khan Championship club Leeds United-ah share an nei bawk.

Keima hlimna!

Klopp chuan, "Miin engtin nge an ngaih ang tih ngaihtuah chunga thutlukna siam thei ka ni lo a, midang tana natna thlen hi ka duh reng reng lo. Ka club lo enkawl tawh zawng zawngte hi ka hmangaih em em vek a, mahse, mi zawng zawng hlimna thlen tur hian enge ka tih ngai ka hre lo a ni.

"Kum 57 ka ni tawh a, kum engemaw chen chu hna ka la thawh theih ka ring. Mahse, tun dinhmunah chuan coach nih ka châk rih lo a, thil engemaw tak tih erawh ka tum - chutihlai tak chuan Red Bull hian min lo sawm a ni," a ti.

Klopp hi tun hnai khan Bayern Munich leh Real Madrid midfielder hlui, inkhelh chawlhsan ta Toni Kroos-a podcast-ah a inlan a, Red Bull a zawm chhan leh thil dang tam tak a sawi lang a ni.

Red Bull huatna

Austrian company Red Bull hian kum 2009 khan German fifth-division club SSV Markranstadt an lei a, RB Leipzig tia an hming vuahin an kalpui. He club hi, 'Germany-a football club huat hlawh ber' an ti hial a, heti taka huat an nih chhan hi a awm.

German Football Association (DFB) dan hnuaiah chuan German club-te chu '50+1' rule hmang ngei tura beisei an ni a, chumi awmzia chu German club-ah ram pawn lam miin 49% share aia sang an nei thei lo. '50+1' rule dan hnuaiah share tam tak hi fan-te ta a ni tlangpui a, club ticket leh thil hrang hrangah fans-in aw an nei ring hle.

Mahse, Leipzig hian '50+1' rule-ah hian a kaw lai an hmu - club member 17 chiah an nei a, hei hi Borussia Dortmund-a share nei fans 1,70,000 nen chuan inthlau tak a ni.Leipzig club member 17 hi Red Bull nena inkungkaihna nei deuh vek an ni lehnghal! '50+1' rule zawm ve tho siin, Leipzig hian dan famkim tawk lohna hmang remchangin, 100% thuneihna club-ah hian an nei tihna a ni a, hei hi German football fan-ten an haw takzet.

Tichuan...

A bik takin hnam thil leh club inrelbawlna ngaihlu tak Dortmund-in RB Leipzig hi an haw zual a, hetiang a nih laia an coach chhuanvawr ṭhinin RB Leipzig neitu Red Bull a zawm hi fan-ten an hua - an rilru puthmang tur ngaihtuahin a awm hle.

Mahse, Klopp chuan, "Fan-te ngaihdan zawtin, 'Engtin nge thutlukna ka siam ang?' ka ti thei lo. Bayern Munich lo zawm ta ila, Dortmund fans tam tak chuan an la na dawn lutuk. Mahse, engtin nge ka tih chuan ang?

"Hnathawh ka duh a, mi zawng zawng tihlawm tuma ka nuna thutlukna ka siam zel a nih chuan ka hlawhchham reng mai ang," a ti a, a chang chuan midang ngaihdan ngaihtuah miah loa thutlukna siam a ngaih chang a awm thu a sawi.

A chawl dawn?

Klopp-a'n Liverpool a chhuahsan dawn khan, "Thathona reng ka nei tawh lo a ni," tiin a sawi a, club football-a pressure sang tak leh boruak rit tak hmachhawn chu hahthlak a ti a, khelmual nunchan chu mangṭha a duh.

German coach hian tun dinhmunah coaching-a kir tumna a neih tawh loh thu a sawi chhuak a, Liverpool kha a team enkawl hnuhnung ber a ni lo ang tih a sawi theih loh. Klopp chuan, "Coaching-ah hian kir leh dawn ta ila, national team enkawl ka duh ang.

"Mahse, coach nih hi ka châk tawh lo a ni," a ti thlawt - Klopp hi Germany fan-ten an ram team enkawl turin an duh a, Red Bull nena an contract-ah pawh hian a team enkawl duhin an dawr a nih chuan a chhuah theih tur thu a inziak niin an sawi. Mahse, ama ṭawngkam aṭanga a lan dan chuan thudik tawk lo a ni mai thei.