Hliam ngah City tan fiahna

Manchester City-in League Cup last 16-ah Tottenham Hotspur an hneh lo a, zanin dar 8:30 hian Premier League-ah Bournemouth an mikhual dawn. Hliam vangin Pep Guardiola hote a buai a, nomawi humhim turin point loh a thiang chuang lo - Cherries hi City kim lo tan fiahna a ni thei ang.

City hian Spurs an hneh loh hma hian table mawngphaha awm Southampton chu 1-0 in an hneh ṭawk a, Bournemouth hi table-ah 11-na ni mek mah se Arsenal pawhin an hneh lo tih hriat a ṭha.

Pep Guardiola-a'n hliam vangin Kyle Walker, Kevin De Bruyne leh Jack Grealish te chu international break hmain a chhawr theih a beisei loh thu a sawi tawh a, Ballon d'Or dawngtu Rodri pawh tun season chhung an chhawr thei dawn lo.

Cherries lakah Jeremy Doku a la dam hman a rinawm lo a, Oscar Bobb leh Savinho te pawh an khel thei lo ang. Chutihrualin Manuel Akanji leh Josko Gvardiol te erawh an dam hman theih dan a awm thung.

A êng zawnga thlir chuan goal khung khawl Erling Haaland a dam a, Spurs an hmachhawn ṭumah hahdamtir a nih bawk avangin Bournemouth tlarhnung tan ven tham a ni dawn. City tan tun hnaiah Matheus Nunes a khel ṭha a, hei hi chanchin lawmawm a ni pha bawk.

Man City boss Pep Guardiola chuan, "Senior player 13 chauh dam ṭha an awm a, a buaithlak takzet. Mahse, kan neih ang te hmang theihtawp kan chhuah ang," tiin a sawi. Spanish manager hian an harsatna neihna lai sawi lian mah se Cherries aiin a dam ṭha chin a thlanawm zawk daih a, chak tura rinkai zawk pawh an ni.