Newcastle mualah Arsenal

Arsenal ṭantuten an la theihnghilh hman lo, season hmasa Newcastle United khelmuala thil thleng kha - November thla tir bawk a ni a, kuminah pawh thlasik boruak inṭan lai takah St. James' Park an tlawh dawn.

Nikum khan Magpies khelmualah hian Mikel Arteta naute 1-0 in an chak lo, goal awmchhun hi Anthony Gordon khung a ni. Goal luh dawna thil thleng hrang hrang avangin Gunners an lawm lo.

Ball chu line pawnah a chhuak hman niin a lang a, hei bakah hian Arsenal defender Gabriel chungah an foul ngei nia an ngaih bakah offside an awm bawk niah an ngai - thil thlengte hi VAR hmanga ennawn a ni a, goal atan an pawm!

Gunners an lungawi thei lo - Emirates Stadium-a mikhual an thlen ṭum chuan 4-1 in an lo sawp let thung a, mahse an intawn hmasaka an point hloh an neih belh phah lo, an champion loh chhan zingah an chhiar tel - tun ṭumah chuan sawisel tur awm loa chak an tum ang.

Premier League season kal laiah William Saliba, Leandro Trossard leh Declan Rice ten hnawhchhuah an tawk vek tawh a, heng inkhelah hian an tuar vek bawk. Saliba chuan hremna a hmachawn zo a, zaninah a inlan thei dawn.

France international lo kir tur hi Arteta tan chanchin lawmawm a ni a, match hnuhnung bera hliam Gabriel chu a dinhmun a chiang lo. Liverpool lakah khan Brazil international hi thlak a ngai a, hliam na tak erawh a ni lo niin an sawi.

Arteta naute hian point an hloh ta zauh zauh, champion lai leh hmahruai mektu Manchester City an phak lohna chu point nga a ni mek a, nomawi chawi an duh a nih chuan Magpies lak aṭanga point thum hmuh a pawimawh.

Newcastle United hnuah Inter Milan nen Champions League an khel dawn - UCL dawta league an khelh lehna hmasa berah Chelsea an tlawh dawn zui, thlasik boruak tak tak thlen hmain an nomawi beiseina a thamral thuak thei dawn tlat, chutihrualin an chak a nih erawh chuan boruak siam ṭhat theihna remchang ṭha lutuk a ni thung.

Magpies pawh hi beisei phak lo mek an ni ve tho. Eddie Howe naute hian point 12 chauh an la nei a, a sang zual 10 zingah pawh an tel phak lo, goal khung an harsat bakah an tlarhnung a phui lo bawk.

Chutihrualin an khelh fuh ṭum chuan team lian hneh turin theihna an nei, a bik takin striker Alexander Isak hi Arsenal pawhin lakluh tuma an hel ve reng tawh kha a ni a, Sweden international striker hi Gunners tana ven uluk ngai tur a ni ang.