La Liga: Real Madrid inkhelh hun an sawn

Ballon d'Or result avanga lawm thei lo Real Madrid-in tui lian vangin kartawpah league match an khel thei dawn lo a, ruahman dan chuan zanin hian Valencia lenchilh tur ni mah se, Valencia khawpuia tui lian avangin an inlan thei dawn lo.

Hetihlai hian league hmahruaitu Barcelona erawh Pathianni zan dar 8:45 hian Catalan derby-ah Espanyol an mikhual dawn a, Real tlansan falna hun remchang a ni. Pathianni zanah vek Atletico Madrid pawh inlanin, zan dar 6:30-ah Las Palmas an mikhual ang.

El Clasico-a Real Madrid sawp hlim Barca hian league match 11-ah vawi 10 hnehna changin hma an hruai mek a, anmahni hnaih bertu Real ai hian point ruk ngawtin an sang zawk mek a ni.

Real an chawl

El Clasico-ah 4-0 ngawtin an mualpho a, Ballon d'Or lamah an titau zui. Real tan October thla tawp dan kha a duhawm mawlh lo - beiseina thar nen November ṭan an tum a, mahse, an thu hriat hmasak chu La Liga-ah an inlan thei dawn lo.

Valencia huam chhunga ruah sur nasa avangin tui a lian a, mi 150 chuangin an nunna chan tawhin, chenna in leh lo tam tak a tichhia. Hei vang hian Spanish Football Federation (RFEF) chuan inkhelh luih chiah a ngai lo a, Valencia chhehvela club ho inkhel tur chu a sawn hla vek.

RFEF hian La Liga, La Liga F leh club-te aṭangin inkhelh hun sawn mai tura ngenna hi an dawng a, uluk taka an ngaihtuah hnuin league leh club te duhdan chu ngaithlain, thutlukna an siam ta a ni. Copa del Rey match ṭhenkhat pawh sawn niin, Valencia hi Parla Escuela nena an inkhel tur pawh sawn a ni.

Luan chhuahna

Real Madrid hian tui lian avanga harsatna tawkte tan hian euro maktaduai khat an theh chhuak a, hei hi Real Madrid Foundation kaltlanga tih niin, Red Cross chuan a mamawhte takin ṭanpuina an dawn theih nan an buaipui ang.

Madrid khaw club bakah hian La Liga pawhin tui lian tuarte tan hian luanchhuah an tum ve bawk. La Liga inkhel tur zingah table-a pathumna ni mek Villarreal leh Rayo Vallecano inkhel tur pawh sawn a ni.

Second dividion lamah phei chuan match thum ngawt sawn niin, Castellon vs RC Ferrol, CD Eldense vs SD Huesca leh Malaga vs Levante inkhelh hun sawn a ni a, Liga F (hmeichhe league) lamah Valencia vs Deportivo La Coruna leh Real Madrid vs Levante chu sawn zingah a tel.

Barca inlan hun

Real inlan loh laiin Barca an inlan dawn a, Pathianni zanah Espanyol an mikhual ang. Hansi Flick-a hnuaiah Barcelona-in an harh tharna chan chhunzawm an beisei dawn a, Catalan derby tiin ngaihven hlawh viau mah se, team ṭha zawk Barca bawk chu chak tura beisei an ni.

Catalan club hian rin loh taka Osasuna an ngam loh hnuah result duhawm zawk an nei chho zel a, a hnu inelna hrang hranga match nga an khelhah goal thum aia tlem khung an nei miah lo - he team hian Robert Lewandowski, Raphinha leh Lamine Yamal an nei tlat.

Kum 36 mi Lewy hian tun season match 14 a khelh aṭangin goal 17 leh assist pahnih a nei leh der tawh a, hetiang zat match-ah vek hian Raphinha chuan goal 10 leh assist vawi kua neiin, Yamal chuan goal ruk leh assist vawi sarih a nei bawk - Bayern Munich leh Real Madrid laka a zawna goal li khung thei team hian Espanyol an huphurh lo ang.