Alcaraz hnehtu Humbert

French Open leh Wimbledon champion ni bawk Carlos Alcaraz chuan Paris Masters khelh laiah quarterfinal a thleng zo lo - Ningani zan lat 16 inkhelah Ugo Humbert hneh loin a zin kawng a tawp.

Centre Court-a inkhelah seeded pahnihna Alcaraz hi rinkai leh buk rit zawk a ni. Mahse, a khingpui Humbert hi tualchhung tlangval leh an chhuanvawr a ni ve tlat a, set thum an khelh hnuah 6-1, 3-6, 7-5 in a chak.

Humbert hi tun dinhmunah world number 18 a ni a, set khatna la tur hian minute 26 chauh hun a hmang. Set hnihnaah erawh Alcaraz-a'n 5-2 a hmahruai fal nghalin a hawi kir tawh lo, set thumna chu Humbert chan a ni leh ta thung.

Spanish tlangval Alcaraz chuan, "Masters 1000 khelhna ho zingah chuan ball kal chakna ber a nih a rinawm a, inkhelh a awlsam lo khawp mai - tun hnai ka inkhelh tawhna ho hrim hrimah pawh ball kal chakna a ni bawk," tiin a sawi.

Inkhel dangah Alexander Zverev chuan tualchhung tlangval Arthur Fils chu 6-4, 3-6, 6-3 in a hneh thung a, a match lehpekah chuan Stefanos Tsitsipas nen an inhmachhawn leh dawn a ni.

Greek tlangval Tsitsipas hi seeded 10-na pek a ni a, inkhel inhnehtawk takah Argentine mi Francisco Cerundolo chu 6-7(1), 6-4, 6-2 in a lo hneh ve thung.

Masters 1000 hi Grand Slam dawta inelna ngaihhlut a ni a, tun season tawp hmain ATP Finals an la khelh chhunzawm leh bawk dawn a ni.