Roma chakna Dybala

Paulo Dybala-a goal khat khung hmangin AS Roma chuan an mikhual Torino chu 1-0 in an hneh a, tun hnaia che fuh hleithei lo Roma tan chuan point thum hlu tak a ni ngei ang.

Stadio Olimpico-a inkhelah hian minute 20-naah goal awmchhun a lut. Torino midfielder Karol Linetty chuan an goalkeeper Vanja Milinkovic-Savic chu ball pek a tum a, mahse a pet zawi hret.

Ball kalin Milinkovic-Savic a thlen hmain Dybala chuan a lo laksak hman a, Argentine forward hian angle zim lutuk aṭangin a khung - Torino player ten lo dansak tum mah se an inpal buai ta zawk, mak angreng takin a lut.

Ivan Juric-a enkawl Roma lamin an goal neihchhun an hum tluan thei a, point thum hmuh nan an hmang. Serie A season kal laiah an goal khung (10) aia an chhuah (11) a tam zawk rih avangin insiamṭhat an la ngai hle thung.

Goal awmchhun khungtu Dybala chuan, "Kan tan chuan chawlhkar harsa tak a ni a, chutiang kara result ṭha kan nei thei hi a lawmawm," a ti. Kar tir lamah khan Fiorentina nen an inhmachhawn a, 5-1 ngawtin an mualpho - tunah erawh hma an sawn hret.

Dybala chuan a goal khung chungchang sawi zuiin, "A nihna takah chuan Karol Linetty-a ball pek kha a na tawk lo tih ka hria, chutih rualin ka awmna hmun leh goal awmdan kha ka hrechiang tawk lo thung.

"Ball ka chan chiah khan vanneihna ka zawng a, a goal thei hlauh mai thei asin tih beiseina nen ka pet. Goal kha a ruak tih hre mah ila, ka awmna a sir em avang leh defender ten an lo veng thei tih ka hriat avangin beisei kha chu ka nei sang lo," a ti.

Roma hi hahchawl hman an ni lo - zanin dar 10:00 hian Hellas Verona an lenchih chhunzawm leh nghal dawn a, tun kar tawpa Serie A inkhel tur zingah chuan mipui ngaihven leh thawm nei lian an ni thei ang.