Punjab an insiam ṭha nghal

Punjab FC-in Ningani zana Chennaiyin an hmachhawn hmaa Indian Super League-a an match hnuhnung berah Bengaluru an ngam lo a, 1-0 a tlawmin, tun season ISL-a an chak zawh loh hmasa ber a ni.

Mahse, season hmasa aṭanga ISL khel ṭan ve chiah club hi an insiamṭha nghal a, an mikhual Chennaiyin chu inkhel hmuhnawm takah 3-2 in an lo hneh - an season hnihnaa league winner nih an tumna kawngah kawng dik an zawh zel.

Jawaharlal Nehru Stadium, Delhi-a an 'home' match kheltu Punjab hian si an phur hmasa zawk. Chennai club tan Wilmar Jordan Gil chuan minute 30-naah goal hmahruai a khung a, tawnhriat nei ṭha zawk team-in rin an hlawh.

Mahse, Punjab tan Luka Majcen chuan second half ṭantirhah goal hnihin a chhanglet a, Asmir Suljic chuan a belchhah bawk. Chennaiyin tan season duhawm tak hmangtu, tun season ISL-a striker 'hot' ber pawl Jordan chuan hun pek belhah khung ve leh mah se, an comeback zo ta lo.

Punjab FC hian Mizo player kawl an nei lo a, hetihlai hian Chennaiyin tan erawh PC Laldinpuia, Laldinliana Renthlei leh Lalrinliana Hnamte ten inkhel bul an ṭan vek a, an team erawh an chhan thei ta bik chuang lo a ni.

Ningani zana hnehna an chan avangin Punjab hi table-ah pathumna an ni a, hmahruaitu Bengaluru chu point ngain an phak lo mek. Hetihrual hian Bangalore club hian match khatin an khel tam zawk tih hriat a ṭha.