Spanish football titawp lailawk dawn

Spain rama football thu­neitu sang ber Real Federacion Espanola de Futbol, (RFEF) chuan thuchhuah siamin Spain sorkar nen TV rights leh thil dang dangah inhmuh­thiamlohna an neih avangin Spanish football tun season a inkhelh hmabak la awm zawng zawng chu tihtawp lailawk a nih thu an sawi.

Spain sorkar chuan tunhnia khan ram chhunga TV rights sum che vel chu tihniama sem rualkhai deuh turin hma an la a, dan thar an duan ang hi hman a nih chuan Spain football first leh second division-in TV rights aṭanga sum an hmuh chu a tlahniam dawn tihna a ni. Dan duan thar hi parliament lamah tih tlang la nichiah lo mah se, pharh chhuah tura ruahman a ni a, hei hi RFEF chuan a haw hle a ni.

RFEF thuchhuak chuan pool revenue aṭanga sum an hmuh tura an beisei zat ang pek an ni loh thu leh 4.55% chiah pek an nih thu an sawi a, an sum hmuh zatah hian an lungawi lo bawk.

Spanish football a match khelh tur la awm zawng zawng hi May 16 aṭangin chawl tura tih a ni. RFEF thuchhuak chuan sorkar hotute nen thla thum chhung inbiakna an neih tawh thu leh an beisei anga inbiakna hi a hlawhtlin loh thu an sawi.

RFEF hian an thutlukna hi an kaltlang pui a nih chuan player 600,000 chuangah nghawng a nei dawn tihna a ni a, ram chhunga match 30,000 khelh tur hmabak la awm bakah amateur club 15,000-ah nghawng a nei dawn a ni.

Spanish Football Fede­ration hruaitute chuan, "Season hmabaka match khelh tur la awm zawng zawng titawp lailawk rih mah ila, inbiakna nei turin kan inhawng reng a, sorkar lam hruaitute hnenah pawh inbiakna nei leh tura sawmna kan thlen tawh a ni," an ti.

Spain sorkar erawh RFEF thuchhuakah hian an la ngawi rih thung. Spanish football expert Andy West chuan, "Spanish sorkar in hetia hma a lak chhan ni bera lang chu tunhnaia league hniam lam zawka khel player te lungawilohna vang a ni. Tuna TV rights hman mekah hi chuan league sang lam club te'n sum an dawng ṭawk ṭawk a, league hniam lama khel te sum hmuh a tlem em em thung. Sum hmuh a tlem miau chuan players hlawh a tam thei lo a, hei hian player zingah nghawng a nei a ni. Real Madrid leh Barcelona-in sum an lakluh zat ringawt te hi a sang bik lutuk a ni," tiin sorkar hmalakna thar a duan chhan a sawi.