Liverpool an vannei; City an comeback

Premier League champion Liverpool-in Ajax laka hnehna chang turin van-neihna an mamawh tel a, Nilaini zan Champions League group stage-ah Dutch club ṭha hi  Nicolas Tagliafico 'own goal' hmangin 1-0 in an hneh. 

Liverpool tana chanchin lawmawm erawh khualmual aṭanga point thum an hawn thei hi a ni a, defender chhuanvawr Virgil van Dijk leh first choice keeper Alisson Becker inhliam chungin goal an chhuah lo bawk. 

Premier League club langsar inkhel dangah Manchester City-in goal chhuah hmasa zet mah se goal thumin an mikhual FC Porto an chhanglet a, hun a tawp meuh chuan 3-1 in hnehna an chang. 

City tan Sergio Aguero (penalty) chuan Champions League-a a goal 40-na a khung a, Ilkay Gundogan leh substitute Ferran Torres-te chuan goal khat ve ve an khung bawk. 

Liverpool-in hliam vangin VVD chu season tluan pawhin an chhawr thei lo mai thei a, Ajax an pan hmain Joel Matip inhliam thu an hre zui bawk - midfielder Fabinho chu tlarhnung laiah pawh chawp niin Joe Gomez nen an inkawp. 

Mahse, Liverpool tana khel ṭha ber lakchhuah tur a nih chuan centre back phuahchawp Fabinho a ni a, Dusan Tadic goal khung ngei tur nia lang invawrh chunga goal line aṭanga a petchhuah chu pui tak a ni. 

Liverpool hian minute 35-naah he inkhela goal awmchhun hi an khung a, Sadio Mane-a shot naran tak chu Tagliafico chuan an lamah a ti lut - hun tawp thlengin goal dang a lut lo a, Liverpool an chak. 

Ajax hian Reds aiin chance an nei ṭha zawk a, Tagliafico-a hun ṭha neih chu Adrian chuan a dansak a, Davy Klaassen-a shot chuan post a per bawk. 

Liverpool boss Jurgen Klopp-a'n inkhel pawimawhah rin loh takin midfield a siksawi a, captain rintlak Jordan Henderson aiah rawlthar Curtis Jones chu European football-a a match hmasa ber khelhtir a ni. 

James Milner chu tun season-a a vawi thum nan bul ṭantir a ni bawk a, midfield-ah Jones leh Georginio Wijnaldum nen an inkawp. Alisson awm loh vangin Adrian chuan bul a ṭan bawk a, Spanish keeper hi a tir lamah chesual mahse goal chhuah loin a insiamṭha.

Liverpool-in 1-0 leka hma an hruai laiin Klopp-a'n a vawi hnih nan risk a la nawn a, tlarhmaa a player chhuanvawr Mohamed Salah, Roberto Firmino leh Mane-te chu minute 60-naah la chhuakin Xherdan Shaqiri, Diogo Jota leh Takumi Minamino-a luhtir. 

Player pathum lut tharin goal keng tel lo mah se Klopp tan lawmna tur erawh a awm a, Jota leh Minamino-ten Ajax tlarhnung tan harsatna rawn siamin an khel a nung hle - a tawpah point thum nen Liverpool an haw. 

Etihad Stadium-ah Manchester City-in Porto an mikhual a, Portuguese champion hi khualmualah an tlangnel hle -  Ruben Dias chetsual zarah Matheus Uribe chuan ball changin City a nawr a, Luis Diaz tan ṭha takin a siamsak. 

Colombian forward hian mual vei lam sir aṭanga lalutin Ederson goal venah a chhuih lut a, minute 14-na chauh a la nih avangin City an hawihai hle. Pep-a nauten bul an ṭan chhe takzet a, Porto-in hmahruaitu nih an phu. 

Mahse, City an hnual lo - Ilkay Gundogan chuan post a pet per a, a let lehlam chan an tumna lamah Pepe chuan Raheem Sterling a ti tlu a, Aguero chuan penalty hi petin goal-ah a chantir. 

Aguero-a'n Champions League-a match 72-a khelha goal 40-a khungna a ni a, European football-a club inelna sang bera heti zat goal khung thei 14-na a ni - ni 230 zet goal khung loa a awm hnuah a khung leh ta bawk a, hriat tel tur erawh ni 230 chhung hian hliam vangin inkhelh loh a ngah hle. 

Sterling-a penalty hlawhchhuah danah Porto an lungawi lo a, penalty hmuh nana tha thawh hmasatu Gundogan-a'n goalkeeper Agustin Marchesin-a rap fuhah an ngai. 

Mahse, referee-in thutlukna a kaltlangpui a, City an vannei - first half tawp hmain Sergio Oliveira chuan Porto tan chance a rawn nei leh a, mahse Kyle Walker chuan goal line aṭangin a lo pet chhuak hman. 

Chawlhlawk hman a nih hnuah Pep Guardiola nauten ngai an awh chho a, khel ṭha em em mai Gundogan chuan minute 65-naah class zetin freekick aṭangin a 

chhuih lut. 

Minute 73-naah Aguero thlaktu Ferran Torres chuan Phil Foden nen ṭha zeta an in 'one-two' hnuah chak nem nghehna goal a rawn khung a, 3-1 in City an chak. 

Liverpool ang thoa hliam ngah Manchester City-in inkhelh zawhah chanchin lawmawm lo an nei a, midfielder Fernandinho chu a ke hliam vanga lakchhuah a ngai. 

City boss Pep Guardiola chuan, "Kan tan chuan thu hriat nuam lo tak a ni. Kar li emaw kar ruk tal chu a chawlh a ngai dawn - game kan ngahzia thlirin kan tan chuan a pawi takzet a, mahse thil thleng tur chu a thleng tawh," a ti. 

Premier League club hian hliam vangin  Kevin de Bruyne, Gabriel Jesus, Nathan Ake, Benjamin Mendy leh Aymeric Laporte an chhawr thei lo mek a, De Bryune leh Laporte hi nimin tlai lam khan training thei tura beisei an ni. 

Chutihrual chuan City hian Inrinni tlai dar 5:00-ah West Ham an lenchilh nghal dawn avangin KDB leh Laporte hi an inlan theih nghal a beiseiawm chiah lo. 

Pep chuan, "KDB leh Laporte chuan training an zawm theih tawh ka beisei a, mahse thil kal zel dan tur erawh ka sawi thei bik lo. Ni thum hnuah London kan pan ang a, a hnuah France pan lehin ni thum hnuah Sheffield kan hmachhawn leh dawn a ni. 

"Kan hun neih dan a chep em em a, hei vang hian player zawng zawng ka mamawh a ni," a ti a, player inhliam an kawl hnem chu an talbuai phah thu a pha lo.