Pacquiao hnek leh turin Mayweather a inpeih
MGM Grand, Las Vegas-a a defensive skill ṭha tak vanga Manny Pacquiao hnehtu Floyd Mayweather chuan Filipino boxer chu hnek leh tura a inpeih thu a sawi.
Vawi 48 a inhnek tawha tlawm hmel la hmu lo Mayweather chuan, "A dar hliam a dam hunah Pacquiao hi inhnek pui leh turin ka inpeih a ni," a ti.
Mahse, an hunlaia boxer ropui ber pahnih anga chhal te hi an inhnek leh kher ang em? tih chu zawhna awm thei a ni. Pacquiao nen an inhnek zawh khan Mayweather chuan vawikhat chiah a inhnek leh tur thu leh a inhnek hnuhnung ber tur chu September thla a nih thu a lo puang tawh a, September thlaah hi chuan Pacquiao dar hliam hi a dam hman dawn lo.
Pacquiao hian nimin khan a dar hliam hi a zai nghe nghe a, a zai tu Dr Neal ElAttrache chuan hlawhtling taka an zai thu leh Pacman chu ngaihtuahawm a nih loh thu a sawi. Mahse, Pacman hi an zaina vang hian kum khat tal chu a chawlh a ngai dawn tho tho a ni.
Mayweather hnek tumtu zinga langsar ber pawl chu Amir Khan a ni. British boxer hian September thlaa Mayweather hnek tura a inpeih thu a lo sawi tawh nghe nghe. Amri Khan leh Mayweather hi an inhnek a nih chuan vawikhat bak inhnek tum tawh lo Mayweather hian hliam vanga kum khat chhung chawl tur Pacquiao hi a hnek thei kher tawh dawn lo tihna a ni.
American boxer hian a title kawl lai chu midang in an inchuh ve theihna hlih vek a pawi tih loh thu a lo sawi tawh bawk a, "Ka hnen aṭanga an lak dawn chuan tumahin an ti thei bawk si lo a, midangin an inchuh ve theih tura ka champion kawnghren hlih mai pawh hi ka pawi ti lo a ni," a lo ti tawh.