September-a Mayweather hnek turin Amir Khan a inpeih

British boxer lar Amir Khan chuan September thlaa a inhnek hnuhnung ber nei tur anga insawi Mayweather chu engtik hunah pawh a cho thu a sawi.

Mayweather leh Pacquiao te an inhnek zawh hlim khan Mayweather hnek leh tura mipui rinkai zingah Amir Khan a tel a, mahse Mayweather-a'n a inhnek hnuhnung ber thla tur anga a sawi September thla hi Muslim tlangval Amir Khan tan chuan Ramadan (chawnghei thla) June-July thla laihawl chhunga neih a ngaih avangin a training a buai theih thu sawiin, September thla ni lo thla danga inhnek puiah a cho. Mahse, Amir Khan chuan a thu hi thlakin engtik hunah pawh Mayweather chu hnek tura a inpeih reng thu a sawi.

Kum 28-a upa boxer chuan, "Mayweather hi September thla laihawl velah a inhnek tlang­pui. Kumin Islamic calendar-ah Ramadan tlema a lo hma deuh avangin September-a May­weather hnek tur hian ka inpeih a ni. Ka chawnghei in ka training a tibuai pha lo ang," tiin American boxer chu a cho hle.

Ramadan thla hi Muslim tan chuan thla thianghlim niin khaw en laiin chaw an ei ngai lo a, an sakhua tan an inserh thianghlim ṭhin a ni. Ramadan neih thla atan hian calendar pangngai hmang lovin Islamic calendar zulzuia kal a ni.

May 29-a Chris Algieri nena inhnek tur Amir Khan hian Pathiannia Mayweather leh Pacquiao inhnek zawh hlim khan Mayweather manager chuan inhnek neihpui tura a sawm thu a lo sawi tawh a, Pacquiao thawhpui te lam pawhin inhnek neihpuia an sawm thu sawiin Mayweather chu inhnekpui a chak zawk thu a lo sawi tawh.

Bolton khawchhuak Khan chuan tunah rih chuan May 29-a a hnek tur light-welterweight champion hlui Algieri lam ringawtah a rilru a pek thu sawiin, "Algieri-ah chiah ka rirlu ka pe rih. Ani hi ka hneh loh chuan Mayweather hi ka hnek thei kher lo ang, chuvang chuan Aligieri hi ka hneh phawt a ṭul a ni," a ti.

Khan chuan Pacquiao-a'n vawi ruk zet a lo hneh tawh Algieri nena an inhnek tur pawimawh zia sawiin, "Aligieri hi hneh lo ila chu mi zawng zawngin boxer ropui tak tak hnek tlak loah min ngai dawn a, ka tan chuan chak ngei hi a pawimawh a ni. Holam ang mai maiah ka ngai thiang lo," a ti.