Serena Williams a vannei

World number one Serena Williams chuan Madrid Open quarter-finals thleng turin Victoria Azarenka a hneh hram.

Kum 33 a upa Williams hian inkhel inhnehtawk takah 7-6 (7-5), 3-6, 7-6 (7-1) in hnehna a chang hram. Williams hian set khatna chu la mai mah se set hnihna aṭangin Azarenka rawn khel ṭha chhoin 6-3 in Azarenka hian ala. Set thumnaah pawh Azarenka hian 6-5 in hma a hruai mai bakah 40-0 in a dinhmun a ṭha tawh bawk. Mahse Williams-i'n a beidawng bik lo a ni tih lantirin match point vawi thum ngawt a pawtthla leh a ni.

A chak hnuin Williams chuan, "Set thum, darkar hnih leh minute 43 chhung khelh chu a hautak hle. A tawpah hnehna ka chang thei hi awih har ka tiin a mak ka ti a, engtin nge hetiang hian alo thlen teih tih hi ka ngaihtuah hial zawk a ni," tiin a sawi.

Inkhel dangah champin lai Maria Sharapova chuan Caroline Garcia chu 6-2, 4-6, 7-5 in a hneh bawk. Seeded pa­lina Petra Kvitova chuan Anastasia Pavly­uchenkova chu 6-1, 6-4 in a hneh bawk.

Player langsar zingah Ana Ivanovic a chak lo a, Carla Suarez Navarro chuan 7-5, 1-6, 6-4 in Serbian star hi a barakhaih a ni. Third round inkhel dangah Australian Samantha Stosur chuan 5-7, 6-2, 7-6 (5) in Svetlana Kuznetsova a hneh lo bawk.