Villa mikhual tur Leeds United

Zanin dar 12:30 hian Premier League inkhel hmuhnawm a awm dawn, club lian ni lo mah se Aston Villa leh Leeds United inhmachhawn tur hi English football ngainatute tan chuan en châkawm a tling.

Villa hian tun season league match li an khelh tawhah hnehna an chang vek, manager Dean Smith naute hi mahni khelh china chak kim thei awmchhun an ni hial. Tun ṭuma an intawnna tur hi Villa Park a nih avangin rinkai zawk an ni dawn.

Season hmasa khan tla mai thei dinhmunah an ding, kuminah erawh Jack Grealish, Ollie Watkins, Ross Barkley leh Emiliano Martinez te an khelh ṭhat ṭhin em avangin team hmuhnawm zingah an tel phak.

Smith-a naute hian Liverpool chu 7-2 ngawtin an sawp thei a, champion lai Reds hi tihpalh thil thua hneh an ni lo tih lantir nan Leicester City an hneh zui leh sak bawk - tlarhnung phui vak lo Leeds tan inven uluk a ngai khawp ang.

Villa hian hliam vangin Brazil international Wesley Moraes an la chhawr thei dawn lo, defender Kortney Hause erawh a hliam a dam tawh thung. Keeper Tom Heaton la dam lo mah se Martinez an neih tawh avangin buaina an nei lo.

Manager Marcelo Bielsa kaihhruaina hnuaiah inkhel hmuhnawm an chhawp chhuak ṭhin, zaninah pawh attacking game hmuhnawm a beisei ngam ang. Chutihrualin an league match hnuhnung berah Wolves 1-0 in an ngam lo, insiamṭhat an tum dawn.

Leeds leh Villa intawn hnuhnung chu 2019 kha niin Championship-ah an inkhel, 1-1 in an inhnehtawk. Tunah chuan Premier League a ni tawh a, a boruak a danglam hret ang, an player neih dan leh khelh dan phung thlir chuan match hmuhnawm a beisei ngam.

Argentine manager Bielsa-a'n hliam vangin midfielder Kalvin Phillips, centre-back Diego Llorente leh Switzerland international Gaetano Berardi te chu a chhawr thei dawn lo, midfielder Adam Forshaw dinhmun a la chiang lo bawk.