Madrid Open aṭangin Federer a tla

Madrid Open second round-ah Roger Federer chu Australian Nick Kyrgios hneh lo in a tla.

Swiss World number 2 Federer hi he tournament-ah hian ṭum thum alo champion tawh a, kuminah erawh 7-6 (7-2), 6-7 (7-5), 6-7 (14-12) a Kyrgios hneh loin third round a inhlangkai zo ta lo a ni.

Kum 33 a upa Federer hian set khat na la mah se service neiṭha Kyrgios-a'n harsa takin set hnihna leh set thumna a chhuhsak thei. Kyrgios-a hi third round-ah John Isner nen an inhmachhawn leh ang.

Seeded pathumna Rafael Nadal pawh in a vawi ngana atan kuminah champion a tum leh mek a, American Steve Johnson chu 6-4, 6-3 in a hneh. Nadal hian third round-ah Simone Bolelli a hmachhawn leh ang.

Chak zo lo Federer chuan, "Ka chak loh chhan ber chu Kyrgios service ṭha lutuk kha a ni awm e. A service hmasa kha a kawhin a na thei em em a, ka vaw let thei ṭhin lo," tiin a sawi. Federer hian Kyrgios service hmasa zawk vawi 85 aṭangin vawi 18 chauh a vaw let thei a ni.

Inkhel dangah Andy Murray chuan Philipp Kohlschreiber chu 6-4, 3-6, 6-0 in a hneh bawk. Murray leh Kohlschreiber hi tunhnai nithum chhungin vawihnih an inkhelhna a ni a, Nilaitawhṭanni khan Munich Open final-ah an lo inhmachhawn tawh bawk. Heng an inkhelh pahnihah hian Murray a dingchang zawk ve ve a ni.