Champions League Thlirletna Dan rual loh Barca leh Lionel Messi

Pep Guardiola-a'n an inkhelh ṭan hmain Lionel Messi chu dan a harsat thu leh dan ngaihna awm lo hial a nih thu a lo sawi lawk tawh a, a sawi dik. Nilaini zan Champions League semifinal first leg-ah Messi goal hnih leh Neymar goal khat thun hmangin Barcelona chuan 3-0 in Bayern Munich an hneh.

Budesliga champion Bayern lo mikhual hi eng club tan mah a chakawm loh ang, Spain a hmahruai mektu Barca khelmual a len luh hi chak duh club tan a phurawm bik lo ang.

Minute 90 chhungin Bayern-in Barca goal zawnah vawikhatmah an pet lo a, hei hi kum2009 Champions League a Bordeaux nen an inkhelh hnua a thlen leh vawikhatna a ni. Barcelona hian hun tawp hma ninute 13 chhungin goal thum an khung thei thung.

Camp Nou-ah chuan

Guardiola-a'n inhliam vangin Franck Ribery leh Arjen Robben chhawr thei lo mah se Robert Lewandowski leh Thomas Muller ala neih tho avangin Bayern tlar hma hi hriam tawk tura ngaih an ni.

Luis Enrique-a'n tun seasona an pathuma goal 100 khung tling thei Luiz Suarez, Neymar lah Messi te tlarhmah a din tlar tir thung.

Barca hmatawng Suarez a hlauhawm a, goal erawh a khung lo thung, Messi through ball ṭha tak chu goal-ah a chantir theih loh bakah Ivan Rakitic cross chu a tauh over chiah bawk.

Bayern-in ball chang tam deuh mah se mumal takin Barca tlarhnung an ṭhiat thei lo. Striker Robert Lewandowski chuan half chance nei ve bawk mah se goal zawnah a pet fuh lo a, midfielder Bastian Schweinsteiger chuan six yard box chhung aṭangin uiawm takin a tauh over bawk. Chance dang Bayern in an nei tam lo hle.

Minute 13 chu

Player ṭha rualin minute 76 chhung goal an khung loh hnuah, Messi a rawn inlar. Dani Alves ball pek dawng tu Messi hian box pawn aṭangin mawi tak maiin minute 77-ah Bayern goal-ah a thlawh lut, Manuel Neuer tan dan ngaihna a awm lo. Barca-in 1-0 in hma an hruai.

Barca attacking midfielder Ivan Rakitic chuan Messi tan ball duthusam pein Messi hian box chhungah a tlan luhpui nghal. Lo dan tum tu defender Jerome Boateng a bum thluk hnuah Neuer-a dan theih loh turin minute 80 naah a chip goal zui lehnghal.

Khualmualah Bayern an hawihai a, Barcelona an phur chhunzawm thung. Hun tawp hma chiahin Messi bawk kan hmu leh a, mahse tun ṭumah erawh goal khungtu ni loin a siamsak tu a ni thung. Neymar chuan box chhungah rang takin German goalkeeper Neuer a bum. Hamrik hnuhnung a ri zui a, Barcelona-in 3-0 in Bayern Munich an hneh.

Eng nge an sawi?

Bayern Munich manager Guardiola chuan, "Hun tawp dawn khan kan chanchinṭha a nuai reh chiang hle. Kan khingpui te kha an ṭha em em a, an tlar hma aṭanga hnungber thlengin player ṭha tak tak vek an ni. Player ṭha zingah ṭha bik a awm a chu chu 'Leo' kha a ni chiang, ani kha kan hneh lo. Kan beiseina erawh a la thi lo," a ti.

Barcelona manager Luis Enrique chuan, "Bayern player ṭha rualin kan goal zawnah vawikhatmah an pet lo thei kha a mak zawk hial. Chutih rualin ka player te khelh ṭhat vang a ni tih erawh ka chiang. Messi hi chu fak vak dan a awm lo hial zawk ang, midang nena khaikhin chi pawh a ni lo. Ani hi chu a danglam bik mai bakah a thiamna hi a sang fal hle a ni," tiin a sawi.