Khawvel club hlu ber Real Madrid

Forbes tarlan danin Real Madrid chu football club zinga hlu ber a ni a, kumin hi kum thum chhung club hlu ber a zawna an hauhna a ni bawk.

Spanish club hlutna hi nikum (2014) ai khan kuminah 5% in a tla hniam a, an hlutna $3.26 bn (£2.14bn) a ni. Real pawisa lak luh zat $746m (£489m) a la tam ber tho avangin an la hlu ber zel.

Real hi Barcelona leh Manchester United te'n an dawt. United hian tun season-ah Champions League an khel pha lo a, season liamtaa pasarihna an ni nachungin $703m (£461m) an la lut. Result ṭha lo nachungin United hian gate entry aṭangin pawisa an la lut hnem ber tho.

Manchester United hian season thar aṭangin Adidas kut chhuak an ha dawn a, Germany company leh United hi kum 10 atan pound maktaduai 750-in an inrem.

Premier League club zingah Manchester City, Chelsea, Arsenal leh Liverpool te club hlutna sang 10 tarchhuah zingah an tel pha bawk.