Manchester United pan tur Depay

Dutch League-a PSV champion puitu Memphis Depay chuan season tharah Manchester United a zawm dawn. Club pahnih hi player transfer chungchangah an inrem tawh a, June thlaa transfer window in hawn hunah medical a nei ang.

Kum 21-a upa Memphis hi ke dinglam hmang chung siin left winger atana hman ṭhin a ni a, Dutch under-17 team chu 2011 European Championship-ah a champion pui a, 2014 FIFA World Cup-a Netherlands pathumna nih kawngah goal hnih a khung bawk.

Tun season-ah Depay hian league match 28-ah goal 21 a khung a, PSV chu kum 2008 hnua a vawi khatna atana an champion-na kawngah a thawh hlawk hle.

Manchester United-in Cristiano Ronaldo thlak tura an lak Antonio Valencia chu wing back-ah hman a ni tawh a, player manto Angel di Maria pawh season khatnaah a hlawhchham bawk.

Depay hi United-a Dutch player 10-na tur a ni. Premier League ṭan hmain Arnold Muhren chuan kum 1982-1985 chhung khan Manchester United tan a khel tawh a, Premier League ṭan hnuah Jordi Cryuff, Raimond van der Gouw, Jaap Stam, Ruud van Nistelrooy, Edwin van der Sar, Robin van Persie, Alexander Buttner leh Daley Blind te an khel leh tawh bawk.

Manchester United player hlawthling Stam, Nistelrooy leh Park Ji Sung hi PSV aṭanga United zawmtu an ni.