A chanchin sawi nawn ngai leh ṭhin 'Messi'
Bayern Munich manager Pep Guardiola-a'n Barcelona a hre chiang a, a enkawlna hnuaiah kum li chhungin trophy 14 a lak pui. Guardiola hi Champions League semifinal khel turin Nou Camp-ah a kir a, inkhelh ṭan hmaa a sawi chu 'Messi dan theih loh' tih a ni a, a ṭawng uar lo.
Barcelona-in 'tiki taka' an khel a, Catalan club khelh dan hmang hrual mumtu Guardiola-a'n 'tiki taka' kalphung thoin Bayern a khelh tir a, team pahnih danglamna chu Messi a ni. Argentina captain hian goal hnih a khung a, Barcelona hi Champions League final khel turin an dinhmun a ṭha hle.
Messi hi kum 27 chauha upa ni mah se mimal chawimawina dawn theih ang chu a dawng vek tawh. Barcelona tana a khelh ṭan tirhin a hun laia player ropui Ronaldinho leh Thiery Henry te pawh an awm a, an dal zo lo. A lar tawh hnuah Barca-in Zlatan Ibrahimovic an la lut a, thiam ber nih duh Zlatan tan Catalan club-ah hmun a awm lo.
Barca-in team tih chak nan Neymar leh Luis Suarez an la lut leh a, player ropui pahnih hi Messi ropui daltu an ni lo a, belhchhahtu chauh a ni. Barcelona attacking trio ten tun season-a an goal thun belhkhawm hi goal 112 a ni a, Real Madrid tlar hma Cristiano Ronaldo, Karim Benzema leh Gonzalo Higuain te'n 2011-12 season-a an goal khung 118 umpha thei dinhmunah an ding.
Real Madrid forward Ronaldo hi player ropui tak a ni a, a vanduaina chu a vanglaia Messi awm ve hi a ni. Portugal captain hian Thawhlehni zan khan Champions League history-a goal khung tam ber record siamin goal 76-na a tauh lut a, nikhat hnu lekah Messi hian a rawn khum leh nghal. Argentina captain hian goal 77 a khung tawh.
Messi an fak
Messi chet dan khan sawi tur pawh minti hre lo
- Andres Iniesta
Messi kan nei a, team dang aia kan chungnunna a ni
- Javier Mascherano
Pep Guardiola-a'n Messi a hria a, a phur tawh chuan dan theih a ni lo tih a hria. Goal hnih ropui tak a khung a ni.
- Gerard Pique
Khawvel dang ami a ni. Barcelona i ṭan lo a nih pawhin hei hi chu i pawm a ngai a ni
- Holland leh Barcelona striker hlui Patrick Kluivert
Messi khel hi hmuh a nuam a ni. A ropui ber
- England captain hlui Gary Lineker
Hun dang chu ni se Cristiano Ronaldo hi player ropui a ni ang. Amaherawhchu Messi hunah chuan player dang zawng chuan a ṭha ber dawttu nih an inhcuh a ngai a ni
- QPR midfielder Joey Barton