Bangalore tan Siraj a vul

Indian Premier League-ah India tana pawha inlan ve tawh Mohammed Siraj-a'n hming a chher a, run riat chauh pea wicket thum ngawt a lak avangin Bangalore Royal Challengers-in Kolkata Knight Riders an sawp.

Kolkata hian bat hmasain over 20-ah run 84/8 chauh an siam a, Bangalore bowler an ngam lo. Bangalore batsman tan hna harsa a awm tawh lo a, over 13.3 lekah run 85/2 siamin hnehna an chang. 

Sheikh Zayed Stadium-ah Kolkata hian vuak hmasak an thlang a, run siam tam ber captain Eoin Morgan pawhin run 30 chauh siamin ball 34 a mamawh bawk. 

KKR-in run 84/8 chauh an tlin a, Bangalore-in Devdutt Padikkal (25), Aaron Finch (16), Gurkeerat Singh (21*) leh Virat Kohli (18*) te hmangin run 85/2 an siam a, wicket riatin hnehna an chang.

Virat Kohli hote hian point 14 an hmu a, vawi 10 khelhah pakhatana Delhi Capitals nen an point hmuh zat a inang. Zanin dar 7:30 hian Chennai Super Kings leh Mumbai Indians te an inkhel leh ang.