F1 entu an awm dawn

Pathianni zanah Portuguese Formula 1 Grand Prix tlan a ni dawn a, car intlansiakna sang ber hi a hmunah fans 27,500 an awm thei dawn - coronavirus vangin mipui kal tur zat hi nasa taka tih tlem a ni.

Inelna hi Portimao khawpui chhim lama awm Algarve International Circuit-ah neih tur a ni dawn, kum 1996 hnu lamah chuan Portugal ram chhunga Formula 1 an tlan lehna hmasa ber tur a ni ang.

Portugal sorkar chuan thuchhuah siamin, "Tlan kawngah hian entu mipui 90,000 zet awm theih a ni, mahse hri leng vangin kalphung pangngaiin a kal theih loh, kumin atan chuan mipui 27,500 chauh an lut thei dawn," an ti.