Blasters-in Kone an lalut

Indian Super League club Kerala Blasters chuan Lyon defender hlui Bakary Kone an lalut a, Russian Premier League club Arsenal Tula aṭangin South Indian club hi 

a zawm. 

Burkina Faso hian season khat chhung atan contract a ziak a, Burkinabe zinga Indian Super League khel hmasa ber a ni dawn - ram tan hian match 83 zet a khel. 

Kum 32 mi defender hian a vanglai hun chu Lyon-ah hmangin French club tan season nga chhung a khel a, match 141-ah goal riat a khungsak. 

Lyon tana a khelh lai hian Coupe de France (2011-12) leh Trophee des Champions (2012) nomawi a chawi hman a, French club tho Guingamp tana a khelh laiin Coupe de France (2008-09)-ah a champion bawk. 

France a chhuahsan hnuah kum 2016 khan Málaga a zawm a, La Liga club-ah season khat a khelh hnuin 2017-18 khan Ligue 1-ah tho kirin Strasbourg tan loan-in a khel. 

Kum 2018-ah Turkish club MKE Ankaragucu-a pan a, beiseina sang tak nen kum 2019 khan Arsenal Tula pan mah se season hnih chhunga match khat chauh a khelh hnuah ISL lam a hawi leh ta a ni. 

Blasters hian Kone hma hian ram pawn player zingah Argentine attacking midfielder Facundo Pereyra, Norwich City striker hlui Gary Hooper, Deportivo La Coruna aṭangin defensive midfielder Vicente Gómez leh Sparta Prague aṭangin centre back Costa Nhamoinesu-te an lalut tawh - season hmasa player aṭangin Atletico Madrid youth system chhuak Sergio Cidoncha an chelh bawk. 

Blasters hian Asian player hmun ruak pakhat awm hnawh khat turin Australian forward Jordan Murray chu lakluh an tum bawk a, he thuziak i chhiar meuh chuan an inlalut fel tawh hial ang. 

A League club Central Coast Mariners forward hi an lalut thei a nih chuan Kerala club hian ram pawn player lak theih chu an la kim tawh dawn tihna a ni.