Zaninah Champion team vs Champions League khelh tum
Nikum tun ang hunah hi chuan Premier League champion nomawi chawi thei tur dinhmunah Liverpool an ding a, an kalkawng daltu chu beisei tur nei tawh lo Chelsea an ni.
Pathianni zan dar 8:30-ah Chelsea khelmualah Liverpool an lenglut dawn a, match thum chiah khelh tur la awmah season thara Liverpool Champions League beiseina thaibo sak theitu tur chu Premier League nomawi chawi chiang tawh Chelsea an ni.
Team inang lo
Premier League-a squad nei ṭha ber pawl Chelsea an champion hi a mak lo. Tunhnai an match hnuhnung parukah chak loh hmel an la hmu lo a, Premier League a an chak loh hnuhnun ber chu January 1-a Tottenham Hotspurs laka an tlawm kha a ni daih tawh.
Liverpool erawh season bul ṭan tirah che ṭha lo mah se season laihawlah ngai an rawn awh chho a, tunhnaiah an tawlh thluk leh avangin season thara Champions League an beiseina chu a thamral mek. Premier League table-a pangana ni mek Reds chung chiahah hian Manchester United an awm a, Liverpool in an hmelma kumhlun United an phak lohna hi khelh zat in angah point li a ni.
Premier League-ah match khelh tur a tam tawh lo a, inkhelh tur pathum la awmah Champions League khel phak tur chuan Liverpool-in chak vek an mamawh bakah Manchester United chetsual leh sual lohah an innghat thui hle. Zanin dar 10:00-a Crystal Palace leh United inkhel result a zirin Liverpool phur leh phur loh a hril thui khawp ang.
Inkhel chhehvel
Stamford Bridge-a Liverpool an len hnuhnung vawi li-ah mual neitu Chelsea aiin Reds an ropui zawk a, vawi hnih chakin vawikhat an in draw a, vawikhat a tlawm zawkah an ṭang thung. Mahse, Chelsea hi Jose Mourinho hnuaia khel tur an nih avangin Liverpool tan zuam ngawt chi an ni lo. Potuguese coach ropui hian Premier League bikah Stamford Bridge-a match 96 a enkawl tawhah vawi khat chiah tlawm hmel a la hmu a, a naute tan chuan a thlamuanthlak khawp ang.
Liverpool in tuhnnai an match vawi kua khelh tawhah vawi sarih chu goal an chhuah miah lo thei a, an harsatna erawh an hmatawng te'n goal khung an uar lo lutuk hi a ni. Europe-ah pawh tlarhnung nei khawng ber pawl Chelsea pal darh hi Liverpool hmatawng tana huphurhawm ang.
Premier League Fixtures
Inrinni Zan
Everton 5:15 PM Sunderland
Aston Villa 7:30 PM West Ham United
Hull City 7:30 PM Burnley
Leicester 7:30 PM Southampton
Newcastle 7:30 PM West Brom
Stoke City 7:30 PM Tottenham
Crystal Palace 10:00 PM Man Utd
Pathianni Zan
Man City 6:00 PM QPR
Chelsea 8:30 PM Liverpool
Thawhṭanni Zan
Arsenal 12:30 AM Swansea City