RFEF hmalakna player te'n an thlawp
Spain rama professional football player intelkhawm pawl Asociacion de Futbolistas Espanoles (AFE) chuan an rama Football thuneitu sang ber Real Federacion Espanola de Futbol (RFEF) chu an hmalaknaah an thlawp tlat thu an sawi.
RFEF hian tunhnaia Spain sorkar in Teelevision rights kaltlanga club te sum hmuh dan chungchang tihdanglam a tumna duh loh vangin May 16 aṭanga ṭanin tiam chin awmloin Spain ram chhunga football match khelh tur awm zawng zawng chu a titawp lailawk rih a ni.
Tunhnaiah Spain rama 1st division leh 2nd division club intelkhawmna Liga de Futbol Profesional (LFP) chuan Spanish Football Federation hmalakna hi an dodal thu sawi mah se players intelkhawm lam erawh chuan an thlawp ṭha hle thung.
AFE hruaitute chuan Ningani khan chanchinthar lakhawmtu te kawmin Spanish Football Federation hmalakna chu an thlawp thu an sawi a ni. Chanchinthar lakhawmtute kawmnaah hian AFE president Luis Rubiales bakah player langsar tak tak Xavi, Andres Iniesta, Gerard Pique, Iker Casillas, Dani Parejo leh Carlos Vela te chu an kal bawk a ni.