United winger thar Depay belchiang ang

9th May, 2015

Manchester United-in Premier League-ah match thum a zawnin an chak tawh lo a, an chak loh ṭumin goal an khung lo vek bawk. Field chhunga result ṭha lo hi khelmual pawn chanchin ṭhain a hliah khuh a, Memphis Depay hi Dutch manager Louis Van Gaal season tawp boruak ti zângkhai tu a ni.

Man leh mual

Dutch winger Depay man hi official-a puanzar ni lo mah se PSV leh United inremna hi pound maktaduai 25-30 inkar ni tura rin a ni a, a contract hi kum 2019 thleng daih tura ngaih a ni a, kum khat pawhsei theihna a awm bawk.

Karleh hian kum 21-a upa winger hian medical a nei ang a, a paltlang a nih chuan June thlaa transfer window hawn hunah United a zawm ang.

Depay kamchhuak

PSV champion-na kawnga goal 21 khungtu Depay chuan, "Tum thar neih a ṭul a, chu chu Manchester United nomawi chawipui a ni. Beiseina chu rinna nen kan ti hlawhtling tur a ni tih hi ka thupui a ni. Eredivisie-a PSV champion pui hi ka beiseina a ni ṭhin a, tunah chuan kan ti hlawhtling ta. Keimaha rinna nghat ṭhintu PSV supporter zawng zawng chunah kan lawm tak meuh meuh a ni," tiin a sawi.

Depay hi Dutch manager Van Gaal-a hnuaiah Netherlands tan a lo inlan tawh ṭhin a, Paris St-Germain leh Liverpool te nen pawha sawi zawm niin nikum khan Tottenham sawmna chu a lo hnar tawh bawk.

PSV aṭanga bul ṭanin Ducth champion tan hian vawi 104 inlanah goal 43 a khung tawh. PSV sporting director Marcel Brand chuan, "Boruak lian tak nena Depay-a'n PSV a chhuahsan tur hi kan lawm hle a ni. Player ṭha tak, kan team tana pawimawh tak kan chan a, PSV chuan a kal zelna turah duhsakna kan hlan," a ti.

Depay hi 2014 World Cup-ah Netherlands squad-ah a tel a, ram tana a inlan hmasak ber ṭum chu October 15, 2013 kha niin World Cup qualifying-a Turkey 2-0 a an hneh ṭumin hun tawp dawnah luh tir a ni.

Tunge Depay?

Kum 2003 khan kum 9 leka upa niin Depay hian an khua Moordrecht chhuahsanin Sparta Rotterdam a zawm a, kum thum hnuah PSV-ah a lut a, he club hi tun dinhmun a thlen theihna chhan chu a ni.

Dutch journalist Thijs Slegers chuan, "Memphis hi Rotterdam kawrthler ṭawp laiah ṭhian sual a kawp ṭhin a, PSV scout ten an hmu fuh hlauh a. Kum 12 leka upa ni chung siin a ṭhiante laka hruai hran chu a mamawh takzet a, Eindhoven lama a insawn hi tun dinhmun a thlen theihna chhan a ni," tiin a sawi.

Depay pa hi Ghanaian a ni a, kum lia upa a nihin a nu nen an in ṭhen a; a pa nena an inkar hi a ṭhat loh avangin a pa hming hi a chhawm lo bawk. A sei lena hmunin a zir loh avangin PSV coach tan Depay enkawl hi a awlsam lo a, hemi kawngah hian assistant coach Fred Rutten a thawhhlawk hle.

Sledgers chuan, "Rutten hian Depay-a enkawl dan tawk a thiam em em a, a thil tih ṭhinte sim tirin football chauh ngaihtuah turin a fuih. Rutten hi Depay-a thlak danglamtu a ni," a ti.

Dutch Journalist chuan sawi zelin, "Rappers te nen an inkawm a, music video-ah te a lang a. Club thuneitute chuan a kawm ṭhinte thlah turin an duh," a ti.

Depay hi kum 17-a upa a nihin kum 2011 khan khan Dutch Cup-ah a inlan a, hetah hi chuan a nungchang a ziaawm tawh hle. Dutch winger hian pawisa hman dan a thiam loh bawk avangin financial advisers neih tir a ngai hial.

Sledgers chuan, "Depay hi a la naupang reng a, a la â reng bawk. Amaherawhchu field chhunga a hnathawh en hian a professional zia a lang," tiin a rintlak tawh tih a sawi.

Engtin nge an sawi?

Southampton boss Ronald Koeman chuan, "Season ṭha tak a hmang a, hmasawnna tur pawh a la ngah hle. Premier League-ah inelna a san avangin a hmabak hi a awlsam lo ang. Talent nei ṭha tak a ni a, a rang bawk a, Manchester United hian player ṭha tak an la lut a ni," tiin a sawi.

Wigan leh Portsmouth defender hlui Arjan de Zeeuw chuan, "A hlawhtlin ngei ka ring. Mi tam tak chuan a luhlul avangin player lianah an ngai lo maithei, amaherawhchu player ṭha tak a ni a, hmabak nei eng tak a ni. Holland-ah chuan player of the season a ni chiang a, PSV inghahna a ni a, an champion-na chhan a ni," tiin a sawi.

Memphis Depay league career stats

Season Pld Starts Minutes Goals Min/Goal Assists

2011-12 8 0 130 3 43.33 1

2012-13 20 2 492 2 246 3

2013-14 32 32 2703 12 225.25 7

2014-15 28 28 2394 21 114 4