A chetsualna hmunah Alonso a kir dawn
Pathianni hian Circuit de Barcelona-ah Formula 1 Spanish Grand Prix an tlan dawn a, he hmunah hian season ṭan dawn inbuatsaih lai khan McLaren driver Fernando Alonso chu a lo chesual tawh. Alonso hian a chetsual vangin intlansiak hmasa ber Australian grand Prix pawh a tlan theih loh phah hial. A hliam te a dam tawh avangin Pathianni hian Alonso a intlansiak thei ngei tura ngaih a ni.
Intlansiak tlankawng Circuit de Barcelona hi Km 4.655 a thui niin kawngkawi 16 a awm bawk. Nikum khan Lewis Hamilton chu pakhatna a ni a, Sebastian Vettel chuan 15 na aṭangin intlansiak ṭan mah se intlansiak a zawh meuh chuan palina dinhmun a luah. Anni pahnih hi kuminah pawh driver ngaihven hlawh tur te zinga ami an ni ang.
Vawihnih World Champion lo ni tawh Alonso hi kum 2013 khan Spanish Grand Prix-ah hian pakhatna alo ni tawh a, ani chauh hi an rama intlansiaka pakhatna ni thei awmchhun a la ni. He hmunah hian ṭum sarih zet chu Alonso hian podium a lo luah tawh a ni.
McLaren driver Alonso chuan, "Season ṭan hma a thil thleng kha ka la theihnghilh lo a, kha kha chu tihpalh thila ni tih ka chiang. Chuvangin he hmuna intlansiak hi ka huphurh hran lo a, buaina leh harsatna nei lo a intlansiak hmachhawn turin ka inringtawk hle. Hnehna ka chan theih pawh ka beisei," tiin a sawi.