Mumbai City-in Jahouh lakluh thu puang

Indian Super League club Mumbai City chuan season thar atan midfielder Ahmed Jahouh an lakluh thu an puang a, season thum liam ta chhunga FC Goa tana khel midfielder hian kum hnih chhung atan contract a ziak. 

Mumbai club hian FC Goa boss hlui Sergio Lobera chu an coach thar ni turin an lalut a, Spanish coach hian Goa lama a enkawl zingah Hugo Boumous, Mourtada Fall leh Mandar Rao Dessai-te chu a lo lalut tawh a ni. 

Kum 32 mi Jahouh hi Morocco tana vawi riat inlan thei a ni a, Goa tan league match 56 khelin goal khat a khung a, assist vawi sarih a nei bawk. 

Manchester City neitu City Football Group (CFG) zinga tel thar Mumbai hian ram pawn player zingah Sydney FC striker Adam le Fondre, Paris Saint-Germain striker hlui, season hmasaa Kerala Blasters tana khel Bartholomew Ogbeche leh Japanese midfielder Cy Goddard-te an lalut tawh bawk.