Europa Thlirletna Champion lai Sevilla dimhmun a ṭha

Nilaitawhṭanni zan khan Europa League semifinal first leg khelh a ni a, cham­pion lai Sevilla chuan Italian Fiorentina chu 3-0 a hnehin final lut leh turin an dinhmun a ṭha tawh hle.

Spanish club tan hian full-back Aleix Vidal chuan goal hnih a thum bakah Kevin Gameiro chuan goal khat a khung bawk.

Champion lai an vul

Sevilla khelmual Ramon Sanchez Pizjuan Stadium a inkhelah hian mikhual Fiorentina-in bul an ṭan ṭha zawk a, Mario Gomez chuan a tir minute 15 chhungin goal khungna hun ṭha vawihnih nei mah se a pet over ve ve. Sevilla hun a thleng ve ta, an hun ṭha neih hmasa ber hmang ṭangkaiin striker Carlos Bacca siamsak chu Vidal-a'n goal-ah a chantir nghal.

Fiorentina-in Matias Fernandez hmangin an si phurh sutna hun an hmu ve zui a, mahse Chilean player hian six yards atang lekin keeper Sergio Rico a paltlang zo lo.

Second half-ah Sevilla-in bul an ṭan ṭha ve thung, Vidal bawk a hlauhawm leh. Minute 52 naah box dinglam kil aṭangin mawi takin an goal hnihna a khung. Minute 75 naa lo lut Gameiro chuan ball a khawih hmasak berah goal thun nghalin a team te 3-0 in hma a hruai pui.

Fiorentina hian an si phurh sut ṭhen tumin bei va mah se Sevilla tlarhnung an su nghing zo lo a, English defender Micah Richards-a'n uiawm takin a tauh over tih loh chu chance ti a sawi tur an nei hran lo.

Sevilla manager Unai Emery ala fimkhur a, final an la luh chian bik loh thu sawiin, "Minute 90 chhung ṭha takin kan khel ala ni chauh a, Florence-ah minute 90 dang kan la khel leh dawn a ni tih kan hriatchian angai. Engpawh ala thleng thei a, final kan lut tiin sawi ala hun lo," tiin a ṭawng fimkhur hle.

Stadio San Paolo-ah chuan

Semifinal lehlamah Italian club tho Napoli leh Ukrainian club Dnipro Dnipro­petrovsk te chu goal khat ve ve khungin an inhnehtawk.

Rafael Benitez a naute hi an khelmual a inkhel an ni bawk a, goal pawh an khung hmasa. David Lopez chuan Lorenzo Insigne-a corner pet aṭanga ball lo kal chu an hmahruaina goal ni turin a tuah goal. Napoli hian an goal khat neih hi an chakpui tlang mai dawna a lan laiin Dnipro lamin hun tawp hma minute 10 la awmin striker Yevhen Seleznyov an dahlut a, ani hian ball a khawih hmsaber Artem Fedetskiy cross ball chu hnai set sawt aṭangin an siphurh sut nan a thun ve a ni.

May 14 hian second leg khelh leh a ni anga, final lut turin Benitez a naute hian khual mualah goal an thun ngei a ngai dawn. Spanish manager Benitez hian Valencia leh Chelsea chu Europa League champion nomawi a lo chawipui tawh a, manger dang te la tih theih loh club pathum champion pui thei dinhmunah a ding mek.

Napoli manger Benitez chuan, "Ball kan chang tam em em a, mahse goal khat bak kan khung thei si lo. Anni lam khan goal zawnah vawihnih bak an pet lo chungin goal khat an khung thei tlat si. Kan inkhelh lehna tur hi an khelmual ni mah se goal khat aia tam kan thun ngei tawh ang, chak turin ka naute ka la ring tawk a ni," tiin final luh a inrin thu a sawi.