Premier League coach-ah ka ṭha ber - Carver
Season tawp nan match thum baka awm tawh lo a, tla thei dinhmuna ding Newcastle United manager John Carver chuan Premier League coach ṭha ber a nih thu a sawi mauh mai.
Nikum kum tawp khan Alan Pardew-a'n Newcaslte chhuahsanin Crystal Palace a zawm a, Carver leh Jone Stone te chuan club enkawl hna an chelh lailawk hnuah kumin kumtir aṭangin Carver hi coach a ni. Pardew chhuah hmain Newcastle hi table-ah 10-na an ni a, match 19 khelhah point 26 hmuin tla thei zinga chhiar tel an ni lo.
Carver-a enkawlna hnuaiah Newcastle hian inelna hrang hrang match 17 khelhah vawi hnih chiah an chak a, vawi thum an draw a, a bak match 12 an chak lo. Newcastle hian point 35 hmuin 15-naah an awm mek a, 18-naa awm Sunderland nena an inthlauhna chu point hnih chiah a ni a, Black Cats hi Newcastle aiin match khatin an khel tlem zawk.
Kum 50-upa Carver chuan, "Premier League coach ṭha berah ka la inngai zel. Hmanraw mamawh ang ka neih chuan hna ṭha takin ka thawk thei ang," tiin Newcastle enkawl tura a ṭhat tawk thu a sawi.
Newcastle hi a zawnin match riat an chak lo a, media lam tarlan dan chuan Carver thlak turin England manager hlui Steve McClaren an sawm a, mahse Manchester United assistant coach hlui hian Derby County tana a rinawm thu a sawi thung. Hemi hnu hian Magpies hian Carver chu season tluana an manager tur thu an tichiang bawk.
Hemi chungchang hi sawiin Carver chuan, "Ban tura tih ka ni lo hrim hrim. Lee Charnley (managing director) nen kan inkawm tawh a, ka hna turah ka chiang. Match thum khelh hmabaka Newcastle enkawl tur chu keimah ka ni," tiin a sawi.
Tunge tla ta ang?
Burnley leh Queens Park Rangers te hi chu chhiarkawp danin an la him a ni mai a, ṭang rei thei an nih tawh hmel loh. Hmunruak pakhat dang hi mipui ngaihven chu a ni a, him china ngaih theih chu 13-naa awm West Brom an ni.
18-naa awm mek Sunderland hi match khatin an khel tlem a, an match hmabak hi an chak chuan 14-naa awm Aston Villa chunga awm thei an ni. Hei tak hi club inthlauhna tlem zia ti langtu a ni a, season tawp boruak ti ngaihnawmtu tur a ni.
