Aizawl FC tlin danah Thil fel lo a awm em?

"Aizawl FC leh Chanmari FC inkhela Aizawl FC chak danah thil fel lo a awm ringhlelin Mohammedan SC chu AIFF-ah an zualko," tih thuthang a awm a, hei hi Vanglaini chuan zir chiangin Aizawl FC chak danah thil fel lo pakhatmah a awm lo.

Thil awm dan

Aizawl FC leh Chanmari FC inkhelh hmasakah Chanmari FC hi an chak. An inkhel leh tur, Second Division I League round 13-ah Chanmari FC-in I League tlin beiseina an nei tawh lo a, Aizawl FC tan erawh chak ngei ngei a ngai.

Hetihlai hian Mohammedan Sporting lamin Round 14-ah Aizawl FC hi an la tum dawn. Round 13-ah Chanmari FC-in Aizawl FC an hneh chuan Moham­medan Sporting hian round 14-a Aizawl FC an tum huna an chakin I League kai theihna an la nei.

Media report

Aizawl FC hian a hmaa an hneh loh Chanmari FC chu 4-2 laiin an hneh ta a, Lonestar Kashmir FC an lo chak zo lo bawk nen round 14 khelh hmain I League an kai ta a, Round 14-ah Mohammedan Sporting hi chak mah se awmzia a nei tawh lo.

Mohammedan hian AIFF-ah Aizawl FC leh Chanmari FC hi an insiamrem (match fixing a awm) tiin an hêk a, AIFF chu Mizoram club pahnihte inkhel chhui chiang turin an ngen niin media lamin an ziak.

He thuthang hi football chan­chin ziakna website lamah leh social media hrang hrangah a darh nasa hle.

Thudik chu hei hi

Vanglaini chuan AIFF hnuaia I League thuneitute a be pawp nghal a, anni chuan, "Mohammedan Sporting hian Aizawl FC leh Chanmari FC hi an hêk lo a, thil fel lo a awm lo a, sawi zui tur pawh a awm lo," an ti.

Thil awm dan sawi chiangin, "State pakhat team inkhel tur an ni a, an inkhel result-ah team dangte an la innghah avangin thil fel lo awm palh thei veng turin 'inkhelh hmain' Mohammedan lam hian Aizawl FC-Chanmari FC inkhel ngun taka vil turin AIFF-ah ngenna an thehlut. AIFF pawhin Match Commissioner-ah hei hi kan hrilh a, observer a hranpa kan ruat a, he inkhel bik hi a video pawh kan record thlap bawk. Inkhel pangngai leh dik taka kalpui a ni a, thil fel lo pakhatmah hmuh a ni lo," an ti.

Buai suh!

AIFF official, a hming tarlan remchang lo chuan Vanglaini hrilhin, "Indian football stage sangah Mizoram club an lut ta a, tuna thuthang ang mai mai hi buaipui tur a ni lo. Hetiang hi chu a la awm dawn chauh a, official thu ni lo hi an buaipui chiam chuan buaina tur a tam dawn lutuk a, thil awm dan chu AIFF thuchhuakah zel a chiang ang, thuthang hi chu ngaihven loh tur," tiin I League club thar ni tur tan media report mai mai buaipui a ṭul loh thu a sawi.

Club kamchhuak

Aizawl FC coach K. Malsawm­kima chuan, "Kan inbiak tlat loh avangin 'match fixing' chung­changah ngaihdan pawh ka nei lo. Club dang hian an tlin loh takah chuan chhuanlam an siam mai mai a ni. Kan hriat chin chu 'Sir Thlanga'n hneh tumin kan khel dawn' tih kha a ni a, insiamrem chu ni ila theihtawp chhuaha ngaihtuahna sen kha a ngai lo ang," tiin thamna chungchanga an fihlim thu a sawi.

Chanmari FC coach H. Vanlal­thlanga chuan, "Aizawl FC an chak zawk a, a bak sawi belh tur a awm lo," tiin buaina tur a awm loh thu a sawi.