Bayern Munich-in Atletico an sawp

Champions League champion lai Bayern Munich-in Atletico Madrid 4-0 a sawpin bul an ṭan a, Hansi Flick-a hoten nomawi humhim turin theihna an nei tih a chiang.

Allianz Arena-ah mualneitu tan Kingsley Coman-a'n goal hnih a khung bakah Leon Goretzka leh Corentin Tolisso ten goal khat ve ve an khung bawk. 

First half-ah Bayern-in 2-0 in hma an hruai a, Atletico-in second half ṭantirhah Joao Felix hmangin siphurh sut ṭhenah an inngai a, amaherawhchu Manuel Neuer hmaa ding Luis Suarez a offiside avangin pawm a ni lo.

Felix goal hi pawm ni se Atletico tan beiseina awm thei tur a ni a, an pawm tak lohah chuan Bayern-in harsatna an tawk chhunzawm zo lo. Bavarians tan Joshua Kimmich a hmuhnawm a, goal hmasa ber luhna turin ball a pet thlawk a, Coman-a'n goal-ah a chantir.

Bayern chauh ni loin manager Hansi Flick chungah rinhlelh tur a awm lo. German manager Flick hian Thomas Muller chu hmun pawimawh a chantir zel a, Liverpool zawm ta Thiago Alcantara awm loh a lang lo.

Player thar Leroy Sane awm lo mah se Coman-a'n a rintlak tih a pholang a, French winger hian goal hnih a khung bakah assist vawi khat a nei bawk. Tlarhnung lamah Niklas Sule leh Lucas Hernandez ten an tharum hmangin Atletico striker Suarez leh tlarhmaa ding dang Joao Felix leh Marcos Llorente tan mangchhia an thlen.

Chutihrualin David Alaba leh Benjamin Pavard te tan erawh an chet ṭhat ber zan a ni lo a, tihsual an nei leh ṭhin. Season liam taa an player pawimawh Alphonso Davies chu match hnuhnung pahnihah bench-ah ṭhuttir a ni a, Hernandez khelh dan thlirin Canadian wing back hmalam hun hriatthiam a har hle.

Bayern-in awlsam takin group A an paltlang dawn tih a lang a, Atletico tan pawh a harsat chuan a rinawm loh. Group A-a inkhel dangah Salzburg leh Lokomotiv Moscow te 2-2 in an inhnehtawk a, team pahnih hi Diego Simeone hote chelh thei tur khawpin an ṭhat tawk a rinawm loh.