Durtlang 'N' leh Chawnpui an tlang

YMA Football round of 32 nimin inkhelah Durtlang 'N' leh Chawn­pui te chuan an khingpui ve ve hnehin last 16 an inpet tling ve leh ta. Inkhel hnuhnung ber Armed Veng 'S' leh Durtlang inkhelh laia buaina a chhuah avangin hun tawp hma minute 13 la awmah inkhelh tihtawp a ni a, naktuk chawhma dar 10:30-ah an khelh bang minute 13 hi an khelh chhunzawm leh ang.

Nimin inkhel hmasa berah champion tura rinkai Ramhlun 'S' chuan Durtlang 'N' an hneh lo a, minute 20 naa Benjamin Laltlingzova goal thun chu Ramhlun 'S' tan Lal­rohlua Sailo chuan minute 72-ah a sut hram a, hun tawp thlengin goal dang a luh belh lo. Penalty shootout hmangin chak zawk zawn niin Durtlang 'N' hi 4-3 in an chak ta a ni.

Chawnpui in an ti mai mai lo a ni tih an lan­tir chhunzawm zel a, Lal­thlamuana, Da­vid Lal­tlansanga leh Lalzawm­liana te goal khat ṭheuh thun hmangin 3-2 in 'N' Vanlaiphai Jt. YMA an hneh. 'N' Vanlaiphai Jt. YMA tan Laldingliana leh K. Biaksangzuala te chuan goal khat ve ve an khung bawk.