Allan Border Medal David Warner-a'n mittui nen a dawng
Australian cricketer tana chawimawina sang ber Allan Border Medal chu David Warner-a'n a dawng a, kum 33 mi batsman hian 2016 leh 2017 khan a lo dawng tawh bawk.
Ball tampering vanga mualpho tawh Warner hi a hmingchhiatna avanga hnual loin khelmualah ṭha zawkin a khel a, chawimawina sang a dawn lai pawh hian a mittui a tla hial.
March 2018 khan Warner bakah captain Steve Smith leh Cameron Bancroft te chuan Cape Town-a South Africa nen an inkhelh ṭumin ball an khawih chingpen a; Warner hian hrem vangin kum khat chhung international match a khel thei lo.
Fans leh media lam aṭangin Warner hian sawiselna a tawk nasa a, Australia timualphotuah puhin ram tana inkhel tawh lo tura duhtu an tam hle. Warner ngei pawhin ram tana khel loh hial a inring hman a, amaherawhchu a theihna sang tak avanga ram tana koh a nih hnuah a theihna a pho chhuak.
Nikum World Cup match hmasa berah Warner hian Afghanistan lakah thi loin run 89 a siam a, Pakistan (107) leh Bangladesh (166) lakah century siam ve vein inelna lianah hian match 10-ah run 647 siamin Australia tana siam tam ber a ni. World Cup zawhah 2019 Ashes series khelh a ni a, hetah erawh a ṭha tawk lo.
Warner hi Sri Lanka nen T20 series an khelh ṭumin player of the series-ah thlan a ni a, Pakistan nen triple century (335) a siam. India nen ODI-a an inkhelh ṭumin ODI bikah run 5,000 vaw chhuak lehin Australian zinga run 5,000 siam tling tura hun mamawh rei lo ber a nih bakah siam tling thei palina a ni.
Australia batsman David Warner chuan, "Lawmthu sawina tur tam tak karah ka nu leh pa hming hi ka lam hmasak ber a ṭul a, engtik lai pawha min thlawp tlattu an ni. Ka nupui Candice hi ka lungpui a ni a, eng harsatna pawh ani hi chuan a paltlang mai ṭhin. Amah hian phurna tam tak min pe a, keimah chauh ni loin ka fanute tan i hlu takzet. Ka ṭhatna ber ka lantirna tura min thlawpnaah ka lawm a, kan chhungkaw tana i ṭhatna hi ka rul seng lo ang che. Candice, ka hmangaih che," tiin a nu leh pa bakah a nupui chungah lawmthu a sawi.